918/2022-2023
Champhai, the 16th June, 2022: Vawiin chawhma dar 10:30 atang khan District Disaster Management Authority (DDMA), Champhai District bultumin chhiatrupna thlen thulha che chhuak nghal thuai tura beisei, first responder-te tana inzirtirna 'First Responders Training', nihnih awh tur chu Govt. Champhai College Adventure Club member-te pualin buatsaih a ni. He hun hi Pu James Lalrinchhana, Deputy Commissioner & Chairman, Champhai District Disaster Management Authority chuan khuallian niin a hmanpui a ni.

Khuallian Pu James Lalrinchhana chuan chhiatrupna thleng thei reng laka chetlak dan tur inzirtirna Govt. Champhai College Adventure Club-te puala buatsaih a ni chu lawmawm tiin, chhiatna lo thleng buaipui kawnga mawhphurhtu zinga tel leh che chhuak thuai tura beisei first responder thalai rualte tana training buatsaih chuan rahtha a chhuah ngei a beisei thu a sawi a. Chhiat tawhna hmun thleng hmasa tura beiseite chu mi nunna chhan tura huaisen leh tlawmngai turte, midangte puih duhna thinlung leh sipai rilru pu turtein a chah a. Minute reilote chhungin nunna chhan leh chan theih a nih avangin first responder ten thiamna an neih a tul a, nunna hlu tak an kutah a awm avangin district chhunga khua leh veng hrang hrangahte hetiang lam hawi thiamna nei tura inzirtirna pek a ngaih thu a sawi bawk.

District Bawrhsap chuan first responder-te chet dan azirin mi nunna a himin a himlo thei a, rilru fim tak pua chet a ngai a, tih tur leh tih loh tur hriat a ngai a ni, a ti a. Mipui leh official-te inkara thawk an nih angin khawtlang huapa thahnemngai leh bengvar nih tum turin a chah a. An thil hriat leh zirte midang hnena zirtir chhawng zel turin a chah a. District tana sulsutu tur leh midangte thlamuantu tur an nih avangin taksa, rilru leh ngaihtuahna hrisel neia vawng tlat turin a fuih a. Hriat duh an neihte zawh hrehlo tur leh mahni theihna zawn theuha inchhiar zau turin a chah bawk a. Training tha tak nei turin duhsakna a hlan a, district tana thalai chhuanawm, thlamuanpuiawm, invawng leh inthununna tha nei mi nih tum theuh tura chahin First Responder Training chu a hawng a ni.

Thusawitu dang Pu P. Lalhmingliana, Principal, Govt. Champhai College chuan lirnghing, kangmei chhuak, leimin leh tuilian avanga harsatna thleng theite leh chhiatna a thlen loh nana fimkhur tulnate a tarlang a. Disaster Management & Rehabilitation, DM&R chu mi mangang leh chhiat tawkte tanpui tura din a nih thu leh an hnathawh chu fakawm a tih thu a sawi a. Mite tana nunna thap tura thawk thei tur first responder-te chu chhuanawm a tih thu sawiin, chhiatrupna thleng laka chhanchhuah hna hlawhtling taka thawh a nih theih nana training tha leh hlawkthlak tak nei turin duhsakna a hlan a ni.

Training hawnna hun hi Pi Esther Leihang, SDC, DM&R Champhai chuan a kaihruai a. Pu VL.Hruaimawia, District Organizer, DM&R chuan Disaster Management Method leh National Policy, 2009 chungchang a sawifiah a. Dr. RE. Lalremruata, Medical Officer, CMO Office, Champhaiin First Aid chungchang zirtirna a pe a. Pu F.Lalchhandama, Station Officer, F&ES Champhai hnen atangin kangmei chhuak thelh dan chungchang zirtirna ngaihthlak a ni bawk.

Training hi naktuka kalpui chhunzawm tur a ni a. State Disaster Response Force (SDRF), 2nd IR Battalion Khawzawl ten chhiatrupna thlen thulha chhanchhuah hna thawh dan an zirtir dawn a ni.