917/2022-2023
Champhai, the 16th June, 2022: Mizo Zirlai Pawl (MZP) Headquarters Champhai buatsaihin vawiin chawhma dar 11:00 khan zirlai tithate chawimawina Govt. Champhai College Multipurpose Hall-ah neih a ni a, he hun hi District Bawrhsap Pu James Lalrinchhana chuan khuallian niin a telpui a ni.

Khuallian Pu James Lalrinchhana chuan MZP Hqrs Champhai ruahmannaa chawimawi tur dik takte chawimawina hun buatsaih a ni chu lawmawm tiin, ngaihsan tur dik leh chawimawi phute chawimawi chu thil pawimawh tak a ni, a ti a. Vawiina hlawhtlinna kan chante hi kan thawhrimna rah Pathianin mal a sawm vang a ni a, hlawngtling ta chiah lote pawh hnual mai lova hlawhtlinna sang zawk chang tura bultan nana hmang theuh tur leh, hlawhtlinna changte pawh chapo pui mai lova a aia nasa a tanlak nana hman phah zawk turin a fuih a. Bawrhsap chuan hriatthiamna tak tak nena zirlai thiambel a pawimawh thu sawiin, zirlai kalkhawmte chu Vaki ang maia thiamna tak tak awm lova note bye heart tawp duh tawk mai lo tur leh, zirlaibu leh a dangte rawna zir nachang hre thin turin a fuih a, hei hian in zir chhumzawmna leh kalzelna turah a pui ang che u, a ti. School leh zirlaibu atanga thiamfinna zirchhuahte chu a taka hmanga chhawr tangkai tum tura fuihin, puithuna atthlak laka invenga a taka finfiah tawhsa zirlaibua dah luhte ring ngama chhawr tangkai tum turin a chah a. Zirlaite chu an nun uluk a, taksa, rilru leh thlarau hrisel nei tura tanla sauh sauh turin a chah a ni.

Pu James Lalrinchhana chuan sawi chhunzawmin, a tha zawnga district chanchin hriata ngaihthlak a nih theih nan theihtawp chhuaha tanlak a ngaih thu sawiin, zirlaite chu an thiamnate ram leh hnam leh midangte tana malsawm rawngbawl nana hmang chhuak turin a chah a. Hmabak eng tak nei, nakin lawka ram leh hnam nghahfak ni tur zirlaite chu an thiamfinna ram leh hnam tana hmang tangkai thei tura peipung turin a fuih a. Rualawhna dik leh tum mumal tak nei lawk vek tura zirlai kalkhawmte chu hrilhin, chhungkua, khawtlang leh ram tana chhawrnahawm nih tum turin tun atanga inbuatsaih tan turin a fuih a. Zonun zemawi leh kristian nun dan tha chawisanga kengkawhtu nih tum tur leh, ruihhlo leh a kaihhnawih laka fihlim mi nih tum turin a sawm a, an kalzelna turah duhsakna a hlan a ni.

Thusawitu dang Thangdeihmanga, President, MZP Hqrs Champhai chuan MZP chu zirlai, khawtlang, ram leh hnam tana tha turah a penchhuah thin thu a sawi a. Zirlaite chu ruihhlo laka fihlim tum tur leh awlsam taka sum lakluh duhna atanga inthiar fihlim turin a chah a. Zirlai kalkhawmte chu dinhmun sang zawka Champhai a awm theih nana tanlak puiah a sawm a ni.

Zirlai tithate chawimawina hun hi Lalpianpuia, Vice President, MZP Hqrs. Champhai chuan a kaihruai a. Rev. Vanlalnghaka Jongte in hunserh a hmang a. H. Lalruatdika, Secretary, MZP Hqrs. Champhaiin report a pe a. Pu C. Lalthazuala, Adviser, MZP Hqrs. Champhaiin zirlaite pual Career Guidance hun a hmang bawk a. Lalhmangaihzuala, Fin. Secretary, MZP Hqrs. Champhaiin lawmthu sawiin hun a khar a ni.

He hunah hian HSLC Distinction-a pass zirlai 80 bakah HSSLC Distinction leh First Division-a pass zirlai 100, an vaiin zirlai titha 180 te hnenah chawimawina thuziak cheimawi hlan a ni a. Zirlai pass kim vek awmna School 9 leh mimal titha zirlai 4 te hnenah chawimawina thuziak cheimawi hlan a ni bawk.

Mimal titha 4 chawimawina hlante chu HSSLC Commerce Subject-a pangana dinhmun hauhtu Zonunmawia S/o J.Lalnunzira, Govt. G.M. HSS. HSLC huangah Mathematics Subject Topper VL Hruaitluanga Fanai S/o F.Lalthawmmawia, BC Lalthlamuana English Academy, Mizo Subject Topper pahnih; Lalramtharzuala S/o Lalhuapzauva, Champhai Venglai RMSA Secondary School leh Benjamin Lalrinawma S/o Rokhawliana, Pine Hill Adventist Academy, Champhaite an ni a. School pass kim vek 9 chawimawina hlante chu - B.C. Lalthlamuana English Academy, Bethel Mission School, Presbyterian English School Zotlang, Springdale Academy, Holy Angels School, Holy Mission School, Vengsang High School, King Solomon's High School leh Tuipui RMSA Secondary School-te an ni.