916/2022-2023
Aizawl, the 16th June 2022: Pu Robert Romawia Royte, Minister of State for Sports and Youth Services, etc., chuan June ni 15, 2022 tlai khan State Training Centre, Tanhrilah 1 Mizo Air Squadron NCC Combined Annual Training Camp nei mek ten Cultural Night leh Camp Fire an buatsaih a hmanpui.

Pu Robert Romawia Royte chuan Camp chhimtu cadet te chu an vannei a tih thu a sawi a, COVID19 hripui avanga kum hnih chhung ngawt camp neih theih a nih loh hnua hun tha a inherchhuak leh chu lawmawm hle a ni a ti a. Cadet te chu an camp chhunga an thil zirte hre renga, an hma hun atana tangkai taka hmang turin a chah a ni.

Mizoram chhim lam district 4 te huam turin Lungleiah 2 Mizo Battalion NCC din a nih tur thu a sawi a, Cabinet-in a pawm vek tawh thu leh, kumin July thla hian kalpui tan tura ruahhmanna peih fel a nih tawh thu a sawi a. He hunah hian social media hman kawngah fimkhur theuh turin zirlaite chu a chah nghal a ni.

He hunah hian NCC Cadets hrang hrang ten hnam lam chi hrang hrang leh an thiamthil te entirna hun an hmang a. An camp chhunga an thil zir chhuah te pholanna hun an hmang bawk a. Cultural program neih zawh hian Sports Minister hovin Camp Fire chhitna hun hman a ni a. Combined Annual Training Camp-a tel school leh college zawng zawngte te hian Sports Minister hnen atangin infiamna hmanrua an dawng vek a ni.

1 Mizo Air Squadron NCC Combined Annual Training Camp-ah hian Mizoram district hrang hrang school leh college 24 atangin Cadet 400 chuang telin, Mizorama cadet awm te chu an tel kim hle. He camp-ah hian Training chi hrang hrang (.22 Rifle Firing, Skeet shooting, Arms drill, Foot drill, Cultural Programme te neiin Lengpui Airport-ah Commanding Officer Squadron Leader MK Singh kaihhruaina hnuaiah Flying class neih a ni bawk a. Lecture chi hrang hrang (Fire prevention, HIV awareness, Environmental campaign, Aero modelling etc) a expert ten class lain zirtirna hun an hmang a ni.