915/2022-2023

Siaha;the15th June, 2022: YMA Day vawi 87-na chu Mizoram hmun dang  rualin Siaha khawpui-ah pawh Joint YMA huaihawtin hlung taka hman a ni. Tahrik ni 14,June 2022 zanah Council vaih Hall-ah  Badminton khelin town chhung Branch hrang hrang ten hun hlimawm tak an hmang a. Tukin YMA Day zingkarah mahni Branch Area theuhah Social Work te neiin,  Branch tam zawkin Khawlai thenfai hnatlang an thawk. Vawiin YMA Day chhunah SDFA field,Meisatla-ah  Football,Volley ball,inkawibah, insuknawr leh Arpa insual te hmangin an infiamna hun hman a ni bawk.Vawiin programme-ah hian khawpui chhung member te an tel tha hle.Vawiin Infiamna hun hi Pu Lalsangliana, District Bawrhsap chuan khuallian niin a hmanpui.Khuallian chuan YMA member te chu YMA Day chibai bukin, YMA Day puala infiamna hrang hrangah YMA member te chu rilru thianghlim leh hrisel tak nen a tel turin member te chu a chah a.YMA flag rawng awmzia te sawifiahin, Ram leh hnam humhalhna-ah YMA te chu sulsutu pawimawh tak kan ni.Pawl anga kan hmalakna a tawk mai lo, kei mahni-ah ngei hian Ram leh hnam humhalh a ngai, chumi atang chuan awmze nei zawkin midangte tanpui leh chhawmdawl hna kan thawk  thei dawn a ni, a ti.

YMA Day denchhen hian YMA Chhintuipui Group chuan 11.6.22 (Green Mizoram Day) khan Siaha tuilakna hnarah thing an lo phun tawh a,vawiinah Siaha khawpui chhunga Damdawi In 2 leh Chhawmdawl ngai enkawlna (Home ) 6 (paruk) ah tanpuina pawisa fai an hlan bawk.Vawiin Sport prog hi Pu Ngursangliana, Jt. YMA Secy in a kaihruai a, Prof Chawngkhuma Chawngthu, President, YMA Chhimtuipui Group leh Pu R Lalnghakliana,Secy YMA Chhimtuipui group ten  YMA member te fuihna leh chibai bukna thu an sawi bawk.Vawiin vek hian YMA Chhimtuipui Group hruaitu engemawzat te chu Kawlchaw E & W Branch ten an rawn sawm angin YMA Day an hmanpui bawk.

Zanin hian Group YMA Hall, New Coloney-ah Variety programme hun an hmang leh dawn a, Pu VL Lura Hauzel, Superintendent of Police, Siaha chu khuallian a ni ang. Pu PC. Lalhmingthanga,President Joint YMA chuan hun a kaihruai ang.Tun din hmunah YMA Chhimtuipui Group huam chhungah hian branch 14 - Siaha town chhungah Branch 7 leh khawpui pawnah Branch 7 an awm mek a ni.