914/2022-2023

Champhai, the 15th June, 2022: YMA Day vawi 87-na lawmna hun Leisenzo leh Khuangleng khuaa hman chu vawiin khan Champhai District Bawrhsap Pu James Lalrinchhana chuan khuallian niin a telpui a. Khuallian hian Leisenzo Branch YMA Library sakna tur lungphum a phum bakah kuthnathawktute kawmna hun a nei a, Khuangleng Branch YMA Platinum Jubilee pual Souvenir a tlangzarh bawk.

Khuallian Pu James Lalrinchhana chuan hrileng vanga kum 2 chhung YMA Day lawmna hman a nih tawh loh hnua hman a ni leh thei ta chu lawmawm tiin, kalkhawmte chu YMA Day hmang satliah mai lova intuaithar nana hmanga, a tobul leh nihna, hlutnate ngaihtuah tur leh kan chhawmnung zel em tih inennawn theuh turin a sawm a. YMA chu politics rawng kailo tlawmngai pawl, pawl thianghlim leh mitin huapzo, mi chanhai leh pachhiate pui thintu a ni a, a din chhan angte hriat thar leh a tul a ni, a ti a. Thenawm ram buai avanga raltlante dawnsawn leh tuamhlawm kawnga YMA hmalakna fakawm a tih thu a sawi bawk a.  Member-te chu pawl zahawmna leh hmingthatnate chawinung zel turin a fuih a ni.

District Bawrhsap chuan ram leh hnam humhalh nan zirna uar a pawimawh thu leh zonun zemawi chawinun kawngah thangtharte zirtirna peka tanlak angaih thu sawiin, tlawmngaihna, hnam ziarang leh nunphung chawisante, aia upa zah leh duat nachang hriat thar leh a tul thute a sawi a. Ruihhlo leh a kaihhnawih laka thalaite venhim leh kawng dik kawhhmuh an ngaih takzet thu pawh sawiin, nu leh pa ten fate dinhmun kan hriat tlan a ngai a, thalai hrisel leh hnathawk tlak nei turin kawng dik zawh tura kan kaihhruai a tul thin a ni, a ti a. Inmamawh tawn vek kan nih avangte, sik leh sa nuam leh tuihna tha nei turin thing leh mau, nungcha leh kan chhehvela thil dang awmte kan dimdawia kan humhalh tlat a tul a ni, a ti a. Kalkhawmte chu faina ngaipawimawha a tha zawnga rualelna chang hre tur leh kristian nundan tha chawinun kawnga theihtawp chhuah turin a sawm a. Chhungkua, khawtlang leh tualzal nunah YMA nihna vawng nung zel turin a fuih a ni. 

Thusawitu dang Sub-Hqrs. YMA (SYMA) Champhai Pu F.Lalrinmuana chuan YMA thupui thlan 'Ram leh hnam humhalh' tih chu sawifiahin khua leh tui dik tak ten chanvo an chan theih nana hmalak tulte a sawi a. Mahni hnampui ngei nupui pasala inneih leh hnam tam zawk ni tura pianpung chu YMA duhdan a nih thu a sawi a. Zirna uar deuh deuh a tul thu sawiin, sawrkar officer lian leh a luhrum chinah zofate kan awm theih nan zirna in hniam ber atanga a lu ber thlengin tanlak a ngai a ni, a ti a. Zu leh ruihhlo do kawngah harhthar a ngaih thu pawh sawiin, nun kawng uluk, tawng leh hnam thuam ngaihsan, intodelh, thing leh mau leh nungcha humhalh bakah eiruikna leh hlemhletna do a tul thu a sawi bawk a. Chibing zawnga inla hrang lova zofa vek kan nih anga lungrual taka chen tlang a pawimawh thu a sawi bawk.

Chawhma dar 10:00 a YMA Day lawmna Leisenzo Community Hall-a neih hi Pu  K.Kapliana, Vice President, Leisenzo Branch YMA chuan kaihruaiin Branch Secretary-in report a pe a. VC aiawh thusawi ngaihthlak niin, zirlai pass chawimawina neih a ni a. YMA Day pualin solo leh recitation intihsiakna buatsaih a ni.

Chawhnu dar 2:00 a Khuangleng Branch YMA buatsaih YMA Day lawmna hun hi Pu C.Maliana, President, Khuangleng Branch YMA chuan a kaihruai a. Zirlai pass chawimawi leh YMA Member boralte sunnate neih a nih hnuah YMA Day pual intihsiakna lengkhawmzai, debate, football leh volleyball-te neih a ni.

Tukin khan Pu James Lalrinchhana chuan Leisenzo branch YMA Library sakna tur lungphum a phum a. He hunah hian Bawrhsap chuan Leisenzo branch YMA in hmathlir thui tak nei chunga ngaihpawimawh hmasaka library sakna tur an buaipui chu finthlak a tih thu sawiin, thangtharte tana zirthiamna leh finna a pek ngei a beisei thu a sawi a. YMA Day-a bultan a ni chu inhmeh a tih thu sawiin, sak zawh a niha tangkai taka hman a nih theih nan duhsakna a hlan a ni.

Vawiin vek khan Bawrhsap hian Leisenzo khuaah FOCUS project hnuaia Farmer Interest Group (FIG) leh khawtlang hruaitute kawmna hun a nei a. Ram leilung leh sik leh sa mila thlai chin theihte leh an tawn hriat atanga hmalak ngaihnate a sawipui a. An harsatna leh mamawh thlente line department lam hotute sawipuia a tul anga hmalak dan tur ngaihtuah a nih tur thu a tarlang a ni.