913/2022-2023

Lawngtlai Nikir thla ni 15, 2022: Mizoram Journalists' Association (MJA), Lawngtlai District te'n kum 2016 aṭanga kum tina an hman ṭhin Green MJA Day (vawi 7-na) chu vawiin khan Lawngtlai District Rural Development Agency-a Project Director Pi Marilyn Rualzakhumthangi hovin an hmang.

Lawngtlai Press Club-a Green MJA Day puala inkhawm tawi buatsaihah Pi Marilyn Rualzakhumthangi chuan Lawngtlai District MJA te'n mi dangte kawng dika hruai tura chanchinbu kal tlanga ziah mai duh tawk lo va, a taka an che chhuak tel ṭhin chu lawmawm a tih thu a sawi a. Lawngtlai District-ah hmasawnna hna thawh vangin ramngaw, thing leh mau a chereu nasa hle a, theih tawp chhuaha thing phun belh leh enkawl zui kawngah ṭan lak sauh sauh a ngai a ni, a ti.

He hun hi District MJA Treasurer Pu H. Lalrinmawia chuan kaihruaiin, ṭanna hunserh a hmang nghal a. District MJA President Pu Lalngheta Ralte pawhin Green MJA Day thuchah a sawi bawk.

Lawngtlai District MJA te'n Green MJA Day an hmannaah hian faina lama a thawh hlawk avanga UD&PA Department-in Swachhta Warrior lawmman an hlan, Lawngtlai District MJA Vice President Pu Elvis Lalthangzuala chu District MJA te'n chawimawina thuziak leh tangkafai an hlan a. Pu Elvis Lalthangzuala chuan thu sawiin, faina chu chhungkuaah bul ṭan a, naupang thinlungah tuh ngheh hmasak a pawimawh a, chuta ṭang chuan faina tluantling nei tura hma lakna chuan awmzia a nei thei dawn a ni, a ti.

Lawngtlai Press Club-a hun hman zawh hian Khuallian Pi Marilyn Rualzakhumthangi hovin District MJA te chuan DRDA Office bulah thing ṭiak phunin, ṭha takin an hung nghal a. Vawiina Green MJA Day hun hmannaah hian Lawngtlai DIPRO Pu C. Lalhruaitluanga pawhin a telpui a ni.


Attachment

  • Loading attachment...