No.77/2021-2022

Dated Champhai, the 9th April, 2021: Mizoram State Legal Services Authority (MSLSA) leh Champhai District Legal Services Authority (DLSA) te tangkawp buatsaih, ND&PS Act chungchang zirhona I&PR Auditorium Champhaia neih chu vawiin chawhnu khan Gauhati High Court Judge, Justice Michael Zothankhuma, Executive Chairman, Mizoram State Legal Services Authority leh Champhai District Portfolio Judge ni bawk chuan khuallian niin a hmanpui.

Khuallian Justice Michael Zothankhuma chuan ruihhlo leh a kaihhnawih ten khawvel pumah nghet taka bu an khuar tawh thu sawiin, India ram ngei pawh ruihhlo hluarna ram ten a hual vel avangin thenawm ram atangin a lo luh nasat thin thu leh ruihhlo in nasa taka nghawng a neih mek thu a sawi a. Ruihhlo tawlh leh zuar man thinte dan hnuaia hrem an nih ngei theihna tura tanlak zual a ngaih hle thu sawiin, man veleh atanga chargesheet siam thlengin tihsual neilo tura fimkhur angai a, hrem an nih theihna tura pawimawh information dawn atanga a tawp thenga buaipui tul leh hmalak dan turte a sawifiah a. Tlawmngaia ruihhlo tawlh venga thawk chhuak thin YMA te pawh ruihhlo tawlh leh zuarte dan anga hrem an nih theihna tura thu hretu tha tak nih tum tura chahin, excise leh police-te tha taka tawiawm tlat a tul a ni, a ti a. Dan chu India ram puma zawm tura duan a nih thu leh dan pumpelh zawnga kal a pawi theih thu pawh sawiin, a nih ang anga dan zawm thlap chu a kalkawng thui deuha kan hriat avangin pumpelh zawnga kalpui kan tum thin a, hei hi a felfai loin a fuh thin lo a ni, a ti a. Ruihhlo chungchang dan inzirtirna chu neih leh nise tih anih chuan Covid-19 hrileng ziaawm hunah India ram puma mithiam leh hriathlawhte chah chhuakin huaihawt thei tura ngaihtuahna sen tum a nih thu a sawi a. Inzirtirna hun hmang tura kalkhawmte chu an thil zirte a taka chhawr tangkaitu nih tum theuh turin duhsakna a hlan a ni.

Champhai Bawrhsap Pi Maria C.T. Zuali chuan Mizoram State Legal Services Authority leh Champhai District Legal Services Authority tangkawpin ruihhlo chungchang zirhona hun Champhaia an buatsaih avangin lawmthu a sawi a, Champhai District-in hetiang inzirtirna hi a mamawh hle a, nakin zelah pawh neih leh fo nise a duhawm hle dawn a ni, a ti. Ruihhlo leh a kaihhnawih avangin District Jail Champhaiah tang engemawzah an awm thu leh ruihhlo awmlohna India ram siam kawnga hmalakna Nasha Mukh Bharat Chairman, Champhai District ni bawk chuan ramri depa awm Champhaiah ruihhlo ngai tam tak an awm thu sawiin, natna inkaichhawn theih nen a inkawp tlat avangin ngaihmawhawm tak a ni, a ti a. Ruihhlo tawlh leh zawrh veng tura sawrkarin a ruat ten indaihlo leh hmanraw nei tha lo chung pawha an thahnemngai taka thawka an man nual thin chu fakawm tiin, theihtawp chhuaha tang zel turin a chah a. Mipuite ralmuanga an awm theih nan ruihhlo zuarte aia taima lehzuala thawk turin a chah bawk a ni.

Thusawitu dang Pu Lalrinpuia Varte, SP Champhai chuan Champhai DEF hnuaia Police Station 3 kaltlanga case ziahluh za zela 30 chu ND&PS case anih thu sawiin, ruihhlo chungchang zirhona hun buatsaih chuan rah tha chhuahin Police leh Excise ten an tangkai pui ngei a beisei thu a sawi bawk.

He hun hi Pu R.Vanlalena, MJS, Member Secretary, MSLSA chuan a kaihruai a. Pu Peter Zohmingthanga, Asst. Commissioner, Excise & Narcotics Department chuan ruihhlo man leh chhuichian kawnga hriattur tulte a zirtir a. Pu B. Zoliana, Deputy Commissioner, Excise & Narcotics Department pawhin thu a sawi bawk. Pi Sylvie Z. Ralte, MJS, Addl. District & Sessions Judge-in lawmthu sawina hun hmangin hun a khar a ni.

He hunah hian Pu Joel Joseph Denga MJS, Registrar, Gauhati High Court, Pu Lalbiakzama, MJS, Addl. District & Sessions Judge, Aizawl, Law & Judicial Officers, Police leh Excise thawktute bakah YMA hruaitute an tel a ni.

Vawiin vek khan Justice Michael Zothankhuma hian District Court Zote tlawhin hnathawh dante a enfiah a, Court thar sakna tur hmunhma chhawpchhuah chhin pahnih, Zote leh Vengsang-a mite khawtlang hruaitute leh official-te nen an enfiah bawk a ni.