No.76/2021-2022

Kolasib dated 9th April 2021: Vawiin khan Dr. H.Lalthlangliana, Deputy Commissioner Kolasib chuan Vairengte leh Saihapui V a BSF duty-na hmun thawm that mek leh Screening point a tlawh a, Vairengte CHC leh Police station tlawhin NGO hrang hrang hruaitute nen SDO(C), Vairengte pisaah inkawmna hun a hmang bawk. AH& Vety Department hmalakna a vawk chi tha chah lo thleng mai tur Vairengte khawdai a endik hna kalpui dan turte Dr. Engkunga Chhangte,DVO, Kolasib, Dr. Vanlalpeka,VO, Vairengte te nen an enho nghal bawk a ni. DC hi Pu Isaac C.Lalrempuia, SDO(C), Pu Neng Thianlala, BDO, Bilkhawthlir leh Kolasib district-a official dang ten an tawiawm a ni.

Dr.H.Lalthlangliana chuan kum khat chuang Covid-19 hrileng dona kawng a Vairengte NGO leh Sawrkar thawhhonaah lawmthu a sawi a, India ram hmun hrang hrang a Covid-19 hrileng thawhhnihna thleng mek laka Mizoram kan him theih nan tha thlah lova thahnemngai tak a thawhho chhunzawmpuiah a sawm nghal bawk a ni. DC chuan hrileng dona kawng a khawtlang inkaihhruaina duan kawngah mi rethei leh harsa berte tan phurrit ni lo tur leh nunphung pangai kalpuina kawng a innek chepna thleng zawnga hma lak loh hram hram tum turin NGO hruaitute a chah a, khawtin a rualkhai tak a hmalak a nih theih nan sawrkar thuchhuah ngaichang thiam turin a chah bawk a ni. Ramri tih changtlung nan Sawrkar Department hrang hrang atangin ruahmanna funkim zawk kalpui turin Integrated Border Development Scheme duan mek a nih thu Dr.H.Lalthlangliana chuan sawiin hemi tih hlawhtlin nan hian khawtlang nen a tanrual a tul tur thu a sawi bawk a ni. Covid-19 vaccine pek kalpui mek chu mipuiten ngaipawimawh turin DC chuan a chah a, Vaccine dawng turte chuan a hun tak a vaccine lakna hmun pan thin turin a chah bawk a ni.

Dr.Engkunga Chhangte, DVO Kolasib chuan Vawk pul hri leng lak a kan vawk a him theih nan ramriah uluk tak a ran endik a tul thu a sawi a, African Swine Fever awareness campaign pawh kalpui thuai a nih tur thu a sawi. AH & Vety Department hmalaknaa UK atanga vawk chi tha chah luh mekte fimkhur taka endik a nih tur thu leh chumi atan chuan Vairengte khawdaiah endikna hmun ruahman a tul dawn thu a sawi bawk a ni. DVO, Kolasib chuan ram pawn atanga ran lakluh endik chu Mizoram chhunga ranvulhte him nan a pawimawh chhoh zel tur thu sawiin hemi kawngah hian a hmunhma ruahmanna chungchangah te rilru inhawng tak chungin Sawrkar hmalakna thlawptu ni theuh turin Vairengte NGO hruaitute a chah bawk a ni.

Dr.H.Lalthlangliana hian Zero point, Bairabi road leh Bilkhawthlir inkar kawng NH 154 thawmthat mek chu tlawhin he hna thawktu Ratna Infrastructure Project Pvt. Ltd. a hotute chu hna uluk tak a thawk turin leh a hun tak a zo hman turin a hrilh bawk a ni. DC hian Thinglian North a tlawh bawk a, khawtlang hruaitute kawmna hun a nei nghal bawk.

Tun a AH & Veterinary Department kaltlang a vawk lakluh hi sawrkar laipui scheme 'National Livestock Mission' hnuaia India hmarchhak state tan bik a duan 'Innovative Project on Pig Development Programme for Northeast' hnuaia mi a ni a. Mizoram tan vawk puitling 39 leh a note 9 Yorkshire leh Landrace lak luh a ni a. February 2020 ah Delhi lo thlengin North East a African Swine Fever leng leh Covid-19 hripui leng avangin Punjab-ah dah lailawk an ni ta a, tunah Mizorama lak luh turin phurh chhuah mek a ni.