Ni 25.7.2015 (Inrinni) tlai dar 5 a neih tur K-Pop Contest, Preliminary Round, Aizawl  chu Gate Entry ticket man Rs.500 ruahman lawk tawh chu Mizoram Chief Minister duh dan angin tih danglam a ni a. A duh apiang tan he contest hi a thlawnin a chhim theih a ni.

Organising Committee chuan hemi chungchangah hian inrawnkhawmna neiin Chief Secretary Pu Lalmalsawma hovin tukin khan a pisa ah meeting neih a ni a. He huna Chief Guest tur Minister Pu Lalrinmawia Ralte hovin a pisaah meeting neih  chhunzawm leh niin ticket engemawzat hralh chhuah tawh chu an leina hmun theuhvah an ticket lei tawh sa kengin thleng (refund) leh theih a ni a. Show neihna hmunah chuan ticket thleng hi a remchang dawn lova, mahni ticket leina hmun theuhvah mahni remchan dan angin thleng theih a ni.

K-Pop Contest hi zai leh lama inelna a ni dawn a, Mizoram bakah Banglarore, Patna, Mumbai, Chennai, Kolkata, Nepal leh New Delhi khawpuiah te neih a ni dawn a. Preliminary Round Aizawlah hian Dance Category ah  4our, A-5 , Zo-i , Be Bangtan , War1 , Army Girls, Dance Xenos, Frozen Crew  leh R-Miracle te an tel ang a. Song Category ah Priyanka, Lushai Diamonds, Jared B, Shraddha Sinha, Carolina Norbu, Mettuki United M.U, FMY , 2’cuz  leh Bluzz te an tel dawn a ni. He show hi Concert chu ni lo mahse Korean Pop Star Hyemin Jung leh local artist Sangtei Khuptawng te zai ngaihthlak tur a awm ang a, Cultural dance en tur a awm dawn bawk a ni.

Organising Committee chuan he show MZU Multipurpose Hall, Tanhril a neih tur ah hian a duh apiang tel turin a sawm a. Gate hi tlai dar 2:30 ah hawn tan niin 4:45 ah khar a ni ang. A hmunah hian security khauh taka kalpui tum niin zu leh ruihtheih thil dangte ti lo tur leh a hmunah keng lut lo turin Organizing Committee chuan an ngen a ni.