2173/2025-2026

Lawngtlai 12th November 2025: Kakichhuaha tui hri nia hriat lêng mekah Lawngtlai Bawrhsap Pu Donny Lalruatsanga leh Dr. Lalmuanawma Jongte, Sr. CMO - ten DC Office Chamber-ah hmalak dan tur an sawi dun.

Pu Donny Lalruatsanga chuan tui hri nia hriat lêng mêk avanga nunna chan hial an awm chu pawi a tih thu tarlangin, chak taka hmalak a tul hle a ti a. He hri leng mek thlentu dik tak hre tura chak taka hmalak mek a nih thu a sawi a. Bawrhsap chuan hri leng mek a darh lohna tura hmalak chu tihmakmawh a nih thu tarlangin, a tul anga hmalak a nih tur thu a sawi a. Mipuite chi ai lo tura chahin, tihrem ngei a nih a beisei thu a tarlang nghal a ni.

Dr. Lalmuanawma Jongte, Sr. CMO, chuan report - pein, November ni 4 atang khan case neih tan a nih thu a tarlang a. November ni 11 khan Medical team - ten Kakichhuah hi tlawh nghalin, investigation - kalpui nghal a ni, a ti a. Tui sample - lak niin, ZMC& H lamah endik mek a nih thu sawiin, Salachhuah (Myarmar ) lam atang a hri hi lo lut a an ngaih thu a tarlang a. Kum 5 - 63 inkar te endik atangin, tun dinhmunah he hri vei hi mi - 27 awmin, thalai lamah hei kai an tam zual a ti. Sr. CMO chuan a kaihrhuaina hnuaiah Rapid Response Team- din tawh niin, Health Worker pakhatin a awmpui mek tih a sawi.

Hmalakna tur hrang hrang sawi zingah, tui tihthianghlim, a veite enkawl hmât, faina leh thianghlimna chak taka kalpui ni se an ti a. Kakichhuah leh Salachhuah inkalpawhna kawng chu dan lailawk ni se tih a ni a . Kakichhuah chu kar khat chhung atan ' containment area' ah puan ni se, Medical duty, Election duty , leh Emergency thilah lo chuan tumah luh leh chhuah phal loh ni se an ti a ni. Damdawi tul ang angte chak taka pek ni se, hemi chhung hian Sr. CMO kaihruiana hnuaiah zirchianna chak taka kalpui ni se an ti bawk a ni.

Kakichhuaha tui hri nia hriat lêng mêk vang hian mi - 5 in nunna an chan tawh a, nunna chan zinga pa hnih te hi Salachhuah ( Myanmar) lam niin, Pakhat hi Kakichhuah khua a mi a ni a, a dang pahnih hi refugee- Kakichhuaha awm mek te an ni.