2172/2025-2026

Aizawl; the 12th November,2025: Vawiin khan  Aizawl district bawrhsap leh District Planning Committee (dpc) chairman ni bawk Er.Lalhriatpuia ,IAS kaihruaina hnuaiah District Planning Committee, Aizawl District  member te chuan Planning & Programme  Implementation Department’s   Conference Hall-ah meeting an nei a.

Pi Chingthanmawii Guite, Adviser cum Joint Secretary, P&PI department chuan keynote Address sawina hun hmangin,Vawiin orientation meeting hi India ramin kum 2047 ral hma a ram changkang(developed country) nih tuma a hmalakna Vikshit Bharat @2047  peng pakhat atana district level-a  District Planning Committee hmalakna thuamchak tura din Mizoram District Transformation Programme (MDTP)  chungchanga inhrilhhriatna a nih tih a tarlang.

Pi F.Lalnisaii, Asst.Commissioner, Aizawl district chuan Point Point Presentation hmangin  MDTP din a nih dan leh a din chhan te, a thil tum leh hmalak dan tur te chipchiar takin  a entir a. MDTP hnuaia Mizoram chhunga district te, a tha zawnga thlak danglam(Transform) tura thil pawimawh baseline profile leh District Catalytic Action Plan (DCAP) siam dan tur te, DCAP kaihhnawih thil pawimawh hrang hrang te zirtirna a nei bawk.

Vawiin meeting hi Pu Lalthansanga, Aizawl East-I bialtu MLA  leh Dr. Vanlalthlana, Aizawl North –II bialtu MLA te pawhin  telpuiin, department hrang hrang thawhho that pawimawh zia leh thawhho thiam a tul thu sawiin, Deparment tin te chu an mawhphurhna chanvo theuh tha taka hlen tum theuh turin an chah.

Pu Zoramsiama Hmar, Addl. DC chuan ‘Vote of thanks’ sawiin, vawiin Aizawl DPC Orientation meeting hi a khar ta a ni.