Vawiin khan Lawngtlai Bawrhsap Pu N. Chakhai MCS hovin CADC Art & Culture Hall, Kamalanagar-ah CADC huam chhunga awmte tana "My Project, My NEDP - Mipui Mamawh Intawm Ruahmanna (MiMIR)" chungchang inhrilh hriatna hun hman a ni.

Chawngte Block Development Officer huaihawta he hun hmanah hian Lawngtlai DRDA Project Director Pu R. Lalremsanga MCS te, Kamalanagar-a state leh CADC official-te, bank lama thawktute, village council hrang hrang ai awhte leh mipui thahnem tak an kal khawm a.

Pu N. Chakhai chuan Mizoram sawrkar flagship programme NEDP (New Economic Development Policy) hnuaia hma lakna hrang hrang leh a thil tumte a sawi fiah a. MiMIR awmzia sawi fiahin, CADC hnuaia VC tin chu an khua theuh tihhmasawn nana mipuite chhawr tlan theih tur project tha tak Rs vaibelchhe 1 hu vel pakhat theuh ruahman a, DC hnena theh lut turin a hrilh a. VC hrang hrangin project an buatsaihte chu endik a nih hnuah Lawngtlai District chhunga a tha ber thlan chhuah a nih tur thu sawiin, an project concept note buatsaih kawngah CADC atanga he lam kawnga mi thiamte rawn turin VC tinte chu a rawn nghal bawk. Hemi atana hriat tur tul leh form pawimawhte chu he hunah hian sem nghal a ni.

He hunah hian CADC huam chhunga mipuite'n harsatna an tawh hrang hrangte sawi hona hun hman nghal a ni a. Bank account-a MGNREGA hlawh thun chungchang te, chenna ina tui connection lak chungchang te, bank indaih loh chungchang te sawi lan niin, a kaihhnawih department lam atangin sawi fiahna leh hma lak mek dan te ngaihthlak a ni bawk.

Chawngte BDO chuan Kamalanagar-a mitthi ruang halna tur electric furnace (kawlphe-thuk) bunna tur Rs vaibelchhe 1 (1 crore) hu project proposal pawh Lawngtlai DC-ah theh luh a nih tawh thu sawiin, hemi project chungchang chipchiar zawka sawi ho turin zirtawpni hian BDO office chamber-ah meeting koh a nih tur thu a sawi.