Vawiin khan MPSC Chairman Rev. Zosangliana Colney chuan One-Time Registration leh Online Application, MPSC Mini-Examination Hall-ah a hawng.

MPSC Chairman Rev. Zosangliana Colney chuan One-Time Registration leh Online Application thar neih nana ngaihtuahna sengtu leh hmala tute hnenah lawmthu a sawi a. Application thar chuan sum leh pai leh hun tam tak sen a ti tlem ang, a ti a. India ram State tlemte zingah Online Application hmang thei zingah MPSC a awm chu ropui a ti tak zet a. Information Technology (IT) hmangin sawrkar office tih changtlung zel anih bakah, sawrkar office dawr tura mipuite buatsaihna nena hmalak a nih hi, lawmawm a ti tak zet a ni. Application thar hi mipui lam tan liau liau a ni a, MPSC Office-a Assistant hna dil nan hman a ni nghal dawn a ni, a ti a. Smartphone emaw Computer atanga Internet hman tur neilo leh hmang thiamlo tan MPSC Office-ah Help Desk dah a ni bawk ang, a ti a. Hna diltu te tan awlsamna zawk nih mah se, a thawktu te tan chuan buaipui tur a la tam tho avangin kut ruala thawh a la ngai nasa, a ti bawk a ni. Technology hmanga hmasawnna um zel a nih chuan, MPSC Office-a hnathawk tute indaihlohna erawh a nasa hle dawn a ni, a ti a. Hna diltute pawhin hmangchang hriaa Common Service Centre te pawh hmang tangkai turin a ngen bawk a ni.

One-Time Registration leh Online Application hi e-Bharat hnuaia hmalakna chi hrang hrang zinga pakhat a ni a. Funding Agency hi Ministry of Electronics & IT Department, Govt. of India niin, Implementing Agency hi Mizoram State e-Governance Society a ni. Project Cost hi Rs. 10.81 crores niin, Technical Consultant atan Rs. 31.8 Lakhs leh System Integrator atan Rs 1015.85 Lakhs dah a ni. 

One-Time Registration leh Online Application Demonstration leh Interaction session neih a ni a, zawhna chi hrang hrangte chhanna hun neih a ni. He hun hi MPSC Secretary Pu Lalzirmawia Chhangte chuan a kaihruaia. Deputy Secretary cum Nodal Officer Pu K.Rosiamliana chuan he huna lokal officers, staff, ICT Department, media lam leh I&PR Department te hnenah lawmthu sawiin, Media chu One-Time Registration leh Online Application thehdarh kawngah instrument pawimawh tak niin, thahnem lo ngai turin a ngen bawk a ni.

MPSC hi Kum 1991 din a ni a, hnathawk nghet hi 60 vel niin, MR leh contract zawng zawng nen chuan 120 vel an ni a. Kum 2017-2018 chhunga  vawiin ni thlenga direct recruitment awmzat hi 779 a ni.



Attachment

  • Loading attachment...