Vawiin khan Vanapa Hall-ah 124th Anniversary of Chin-Lushai Conference–cum–ZoRO Convention neih a ni a, Pu Lal Thanzara, Information & Public Relations Minister chuan a hmanpui. Pu C.Ngunlianchunga, Minister, AH & Vety leh ZoRO lama mi pawimawh tak takte’n he hun hi an hmanpui a ni.

Khuallian Pu Lal Thanzara chuan tharum tel lova hnam chanvo leh dikna tundin tumtu, Pathiana innghata Zofate insuih khawmna at chilhtu ZoRO kan nei hi kan vannei tak zet a ni tiin, Zofate insuih khawmna tura ZoRO leh Political Party hrang hrangte thawh hona chu lawmawm a tih thu a sawi a. “Zofate chu khawi rama piang leh sei lian pawh ni ila, Zo hnahthlak kan nihna a bo chuang lo va. Kan inunauna hi international boundary emaw inter-state boundary emaw hian min daidang thiang lo a ni,” a ti. Chi bing leh tawng hrang zawnga inlak hran chu Zo hnahthlak tei tetna a ni tih hriat a pawimawh thu sawiin, Minister chuan inpumkhatna rilru pua nun ho thiam zel turin Zo hnahthlak zawng zawngte a sawm a. “‘Pa hun tiam’ a thlen hunah chuan Zofate hi rorelna pakhat hnuaiah min la hruai khawm ngei ang tih hi i ring ngam ang u,” a ti bawk.

ZoRO President Pu Keihawla Sailo pawhin Politics-a inremna a pawimawh thu sawiin, “Inrem loh lai, inhmuh thiam loh lai sawi nuam titute hi Politician tha an nih ka ring ngai lo,” a ti a. ZoRO hian independence a sual lo va; amaherawhchu, UNO hian ram pathuma then darha awm Zofate duh dan hi min hriatsak ve rawh se kan ti a ni, a ti bawk.

He hunah hian Pu Rohmingthanga Kawlni, ZoRO Vice President chuan kal khawmte lawmna thu sawiin, Party hrang hrang leh NGO hrang hrang aiawh thu sawi ngaihthlak a ni a. ZoRO hruaitu fam tate sunna hun Pu L.Malsawma Colney, ZoRO Vice President kaihhruainaa hman a ni a; Patron-te leh sawrkar mi pawimawh tak tak hnenah chawimawina hlan a ni.

He Convention hi ni hnih awh tur niin, naktuk (January 29, 2016) hian a tiak ang.