Nimin, January 27, 2016 (Nilaini) khan Mizorama Fisheries officer leh staff-te leh sangha chi siam chhuahna farm-a thawktute tana buatsaih Training on “Hatchery Management for Fish Seed Production of Golden & Chocolate Mahseer” Programme kharna leh Certificate semna State Guest House, Aizawl-ah neih a ni a. Fisheries Minister Dr BD Chakma-in a hmanpui a ni.
Ni li lai awh tur hetiang training programme tangkai tak ICAR-DCFR-te’n Mizorama an rawn buatsaih chu lawmawm a tih thu Khuallian Dr BD Chakma chuan sawiin, Sangha thar chhuah lama hma sawn a hlawhtling tak tak tur chuan “3Ts” an tih heng – Talent, Technique leh Technology te hi kan hman thiam a pawimawh hle a ni a ti a. State dang atanga sangha kan lak luh thin hi a lo kalna kawng a thui thin em avangin a chakna zawng zawng a lo bo hman thin a; chu vang chuan sangha hrisel leh tharlam ei tam turin tualchhunga thar chhuah kan tihpun a ngai a ni a ti bawk. “Sangha chi te pawh hi sem leh ringawt thin mah ila, sangha khawitute’n a ngaihna an hriat thin loh avangin a thar hlawk tak tak thin lo,” tiin Minister chuan Fisheries officer kal khawmte chu an thiamna leh an thil zir tharte chu mipuite tana tangkai taka hmang turin a chah bawk.
He hunah hian Principal Scientist Dr Debajit Sarma chuan trainee-te fuihna thu a sawi a. Fisheries Director Pu BD Tyagi pawhin Fisheries lama Mizoram hma lakna hrang hrang report a pe bawk.
Indian Council of Agricultural Research - Directorate of Coldwater Fisheries Research, Bhimtal, Uttarakhand leh Mizoram sawrkar Fisheries Department tang kawpina an buatsaih he training hi January 25-28, 2016 chhunga neih a ni a; mi 25 inziak lutin tha takin an zo vek a ni.
