Chief Minister Pu Lal Thanhawla chuan kan Police te hi India rama Police fir ber an ni thin a, tha taka hna an thawh theih nan leh anmahni inrintawkna an neih theih nan a tha ber chi a thuam hi kan duh a ni a ti. He thu hi vawiina Serchhip District Superintendent of Police office building thar a hawnna a a sawi a ni.

Chief Minister chuan kan thenawm state thenkhat Police zingah khawtlang tana mi hnawksak an awm thin thu leh, hel awmna state ah police hel rimnam an awm thin thu a sawi a. Mizoram police te zingah chuan ruihhlo tihbuai an awm thin thu sawiin, heng mite hi a sorkar tirh atang khan siam that hna thawk nghalin tunah chuan an tha viau tawhin kan hria a ni a ti a. Thu zawm thalo tlem azawng chu an la awm mai thei a ni a tiin. hei hi chu a sawi theih chiah loh a ni a ti. Police tha duh vangin training pawh ngawrh tak leh uluk taka kalpui thin anih thu a sawi a ni.

Chief Minister chuan Police ten hmanraw tha an mamawh rualin chenna tha pawh an mamawh ani tiin, hemi lamah hian sorkar chuan chak taka hma lain, central sorkar pawhin ruahmanna hrang hrang a rawn siam thu a ssawi a. India police tha ber bera ngaihte chu kan police rawn ho turin central sorkarin min rawn pe zel a ni a ti . HPC ten kawhmawh bawl an tumna te chu sorkarin a phal thei ngai dawnlo a ni a ti a. Tihluihnaa YMA an thiah tir pawh din leh turin tunah hian hmalak mek anih thu a sawi bawk a ni.

Tun hnaia sorkar hnathawk hlawha lungawilo ten ni 4 chhung an kal loh chu hna ah an kal lo tih a hriat loh a ni tiin, danin a phal loh anih vangin an kal loh chhung chu an hlawh pek a ni lovang a ti.

SP Office thar hi PWD hnuaia sak a niin, Mizopa chhiara chhawng thum a ni a. Kum 2007 atanga sa tanin, Phase-I , Phase-II, leh Phase-III a then niin, contractor 3 in a basement, ground floor leh 1st floor theuh te hi an sa a, avaia senso chu Rs.145,50,000/- a ni. A hmun luah zau zawng hi 890.50 sq.m a ni.Ni 30.5.2012 khan police department kutah hlan a ni.

Hawnna inkhawm hi Pu Saizela, IPS, DIG(Hqrs) in a kaihruai a, Pu Amulya Patnaik, IPS, Addl DGP in lawmna thu sawiin, kum 2001 ah DIG hna chelha Mizoram Police a awm tawh thu a sawi a. Serchhip District SP Office hawng tura Chief Minister in hun a neihsak avangin lawthu a hrilh a. Mizoram police te hi India a model police ni thei turin thil tulte an nei a ni a ti.

Chief Minister hi a nupui Pi Lal Riliani bakah Pu Lalsawta, Education Minister in an tawiawm a ni.