Vawiin khan Pu R. Lalzirliana Home Minister chuan Mamit-ah Fire Station a hawng. Hawnna inkhawm Chhim Veng YMA Hall a buatsaih, Pu C. Laldina Director, Fire and Emergency Service kaihhruaiah Home Minister Pu R. Lalzirliana chuan thusawiin District Hqrs-a Fire Station awm lo hi thil fel lo tak a nih avangin hetianga sawrkar hmalakna-a Fire Station Mamit-a hawn a lo ni ta hi thil lawmawm tak leh chhinchhiah tlak a ni a ti a. Kangmei laka chhiatna lo thlen palh a hman chauh tur thil anih avangin hman tangkai loh hi khawtlang tan chuan a duhawm zawk mah a, a tul huna hman theih tur a lo awm hi hmasawnna ropui tak a ni a ti bawk.

Home Minister chuan remna leh muanna hnuaiah sawrkar chuan hmasawnna hna a thawk mek a ni tiin kan hun tha neihte hmang thiam lo mi thenkhatten sual kawng zawhin rukruk, Tualthah, Pawngsual leh thil dangte ti thin te pawh kan Police ten thahnem ngai taka hma an lakna avangin chhuichhuah an ni zel a, W Phaileng CDPO pawisa rutute leh Zawlnuam BDO office-a pawisa bote pawh hmuhlet leh mek an nih thu sawiin sorkar hnathawkte pawh danin a phal ang chin sumte fimkhur taka kawl turin a chah bawk. Pu Lalzirliana chuan sawrkarin hmasawnna hna a thawh mekna-ah hian Department hrang hrangte mahni hna bil chauh ngaihtuah lova thawhhona tha tak nei chunga a theih chin chin a thawkho turin a chah bawk a ni.

Home Minister chuan sawrkarin hmasawnna tura ruahmanna a siamah mitinten theihtawp a sawrkar tawiawm-a rinawm tak leh dik taka kan chanvo theuhte kan hlenchhuah chuan chu chu Lalpa duhzawng a ni tiin chutiang mi ni tur chuan kalkhawmte a sawm a ni.

Pu P.C Lalchunglura Addl. S.P (F&ES) in report pe-in Mamit-a Fire Station hi Mizoram-ah a 9-na niin thawktu tun dinhmunah SSO-1 LFM-1 FM-6 Driver-2 leh IV Grade-1 an awm mek a ni.

Fire Station hawnna ah hian Pu Lalrinmawia Ralte Parliamentary Secretary Home , RD etc. Pu V. Lalremthanga D.C Mamit leh Officials te bakah khawtlang hruaitute mi thahnem tak an tel a ni.

Home Minister hian vawiin vek hian hian District Jail, Vaisam Tlang a hmunah tlawhin he District Jail hnathawk theia hmalak dan turte District Bawrhsap leh a kaihhnawih Department hrang hrang hotute a sawipui a, District Jail tur tlawhna-ah hian Home Minister hi Pu Lalrinmawia Ralte, Parliamentary Secretary Home, RD, Pu V. Lalremthanga DC Mamit, Pu C. Lalthianghlima DIG (Prison) te bakah Officials te leh khawtlang hruaitu engemawzatin an tawiawm a ni.