2162/2023-2024

Aizawl the 4th October, 2023: Vawiin Chawhnu dar 3 khan Central YMA Hall, Tuikhuahtlang, Aizawl-ah Pu R. Lalzirliana, Art & Culture Minister chuan "Kan Ram a ni e" tih Music Video Lalparzo & Friends, Lamka Hmar Veng, Manipur te'n an buatsaih chu khuallian niin a tlangzarh a. Dr. Z.R.Thiamsanga, MLA chu khualzahawm a ni.

Music Video tlangzarhtu Art & Culture Minister chuan chitin leh hnam peng zawng zawngte, chhul khat chhuak kan nih angin kan buai hunah chauh ni lovin kan ramin harsatna a tawh loh lai ralmuang taka kan awmlai pawhin inlungrual taka kan awm reng a pawimawh thu a sawi a. Hnamdangin min zuam mai loh nan kan inlungrual a, unau kan ni tih hriatreng a pawimawh thu sawiin kan unau, kan chipuite hnamdang nen an inkap mek chu pawi a tih thu a sawi a, hnehah kan chan ngei theih nan theihtawp kan chhuah a tul a ni a ti. Thian chhan thih ngam hnam kan nihna kan thalaite pawhin an vawngnung tlat chu lawmawm a tih thu sawiin mi huaisen ngaisang hnam ka nih angin kan unaute'n kan ram leh hnam chhan nan an nunna thapa an ram an veng tlat te chu fakawm a tih tak zet thu a sawi bawk. Harsatna kan tawh hi kan inpumkhatna atana Pathian remruat a ni tih pawm tlat turin kalkhawmte chu a chah bawk a ni.

Khualzahawm Dr. Z.R. Thiamsanga chuan Zofate inlungrual taka kan awm theih nan kan rilru ngaihtuahnate inpumkhatna lamah sawrbing ila, he music video avang hian Zohnahthlak zawng zawngte rorelna khata kan awmho theih nana hmanraw pawimawh tak ni se a duhthu a sawi a ni.

Pu R. Lalngheta, President, CYMA pawhin thu sawiin Zofate kan buaina chu a lungchhiatthlak rualin Pathianin zaikhata kan luanza theihna tura a remruat a ni zawk tih kan hriat hian kan lawm letling zawk a ni a ti a. Zohnahthlakte kan inpumkhatna tur hian CYMA chuan theihtawpin hma a la mek zel a, he hla hian inpumkhatna lamah min hruai se, chi bil leh hming tesep a buai lovin, Zofate inpumkhatna hmahruaitu ni ngei turin duhsakna a hlan a. Kan unau, khawi hmunah pawh harsatna tawkte chu YMA a awm chhung chuan kan tanpui dawn a ni tiin chutihrualin, ruihhlo lama inhmang leh misual chu kan dim dawn lo a ni tih hre turin a chah bawk a. Kan tawng bil chu kan vawnnun reng a ngaih rualin kan thinglung a inhnaih a, kan inpawh lehzual nan common language tuna kan hman mek Lushei tawng hi kan thiam tlan a ngai a ni a ti bawk.

Vawiina tlangzarh tak "Kan ram a ni e" tih hla hi L.S Mangboi (L) phuah niin a nupui Pi Nemneihing hnenah hian Music Video tlangzarhtu Art & Culture Minister hian Rs. 20,000/- a hlan a ni.

"Kan ram a ni e" tih Music Video  tlangzarhna hunah hian mi sawmbikte telin Pu Jimmy Lhungdim, Chairman, KWC, Aizawl chuan lawmthu sawiin hun a khar a ni.