2163/2023-2024

Aizawl, 4th October 2023: Vawiin tlai khan Circular Lawn, Raj Bhavan-a ni thum chhung awh Grand Gandhi Jayanti Exhibition buatsaih chu hlawhtling takin zawh fel a ni a. Exhibition kharna inkhawm hi Governor Dr Hari Babu Kambhampati chuan a hman pui a. Exhibition hlawhtlinng taka neih a nih theihna tura thawktute chungah lawmthu a sawi.

Exhibition kharna thu sawiin, Governor chuan he Exhibition hian kut hnathawh leh an thilsiam te hlutsak kan inzirtirna kawngah awmzia a neih a beisei tih a sawi a. He Exhibition a rawn tel, thil zuartute leh exhibition rawn hlutsaktute chungah lawmthu a sawi a ni. Governor chuan he hunpui buatsaih a nih theihna tura tanpuina sum rawn thawh tu Ministry of Textiles, Government of India leh a huaihawttu Commerce & Industries Department chungah lawmthu a sawi bawk.

Exhibition hmang hian Central Government Scheme hrang hrang, PM Vishwakarma Yojana leh a dangte chu mipui nawlpuiin an hriat phah ngei a beisei thu a sawi a. Heng central sawrkar hnuaia scheme tha tak tak te hi uar zawka kan inhrilh a, kan inkawhhmuh a ngai a ni a ti.

Governor thusawi kimchang: dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-closing-function-of-the-grand-gandhi-jayanti-exhibition-at-circular-lawn-raj-bhavan-on-04-october-2023

Organising committee lam atangin Pi Florence Zotluangpui, Director, Commerce & Industries chuan report tawi a pe a. Khawchhe karah exhibition hi a hlawhtling hle tih a sawi. Nikhatna leh vawiin chawhnu inkara thil hralh chhuah zawng zawng atangin Rs 30 lakh bawr vel lai hmuh a ni a. Sum hlawm tam zawk hi Handloom & Handicrafts atanga hmuh niin Ei chawp thil leh eitur dahthat theih te hralhna atang pawhin cheng tam tak hmuh a ni. Exhibition chhimtu zingah sumdawnna atan bul tanna sum chungchang zawhfiah tum mi 860 in Mizoram Rural Bank dawhkan huna thawktu duty te an dawr a. Puantahmi 500 chuangin Department of Science & Technology tena Puantah software an siam, “Zopuan” chungchangah Science & Technology Department dawhkan hun an dawr bawk a ni.

Exhibition a sumdawng te aiawhin  Dr Angie, GR Foods, Pi Malsawm Kimi, Humble Bakes leh Pi Zosangliani, Studio Ngote te Exhibition hlawkthlak an tih thu te, hetiang anga hun remchang sumdawng te invawrh larna tun hun te a tam zawk siam an rawt a ni.