‘An Introductory Brief History of Mizo Tribe” Hindi a Pu C Kamlova, ziah chu vawiin khan I & PR Auditorium ah Pu Lal Thanhawla Chief Minister in a tlangzarh.

Mizopa ngeiin lehkhabu tha tak Mizo History mahni tawng pawh nilo, Hindi ngatin a ziak chhuak chu a lawmawmin a chhuanawm a tih thu khuallian Pu Lal Thanhawla chuan sawiin Mizote zingah Hindi a lehkhabu siam leh chhuah thei mi tlemte zinga mi Pu C. Kamlova chu lehkhabu tam tak lo ziak tawh tu niin a thiam a finna te midangte mamawh leh tangkaia hman a tumna chu a fakawm in ngaihhlut nachang pawh hriat a tul thu a sawi bawk.

Mizo te hian kan State chhungah Mizo tawng kan hman nasat avangin hnamdang kan chhehvel tawng pawh hi kan thiam nal lovin thiam pawh kan tum em em thin lo, mahse tawng inhriatpawh lohna hian inkawmngeihna tur leh inbiakpawh naah a buaithlakin daidanna a siam thei a, chuvang chuan inkiltawihna leh bangbona te sutkian nan leh culture hrang hrang te inhriatpawh nan kan ram, India rama tawng tualleng ber Hindi hi thiam a ngai a, thangthar te pawh in Mizoram an pelh a, an inthlahrun loh nan Hindi thiam hi uar se, India ram khawihmunah pawh an tlangnel phah ngei ang tiin Chief Minister chuan Hindi thiam loh chuan Mizoram pelh in mi mawl ang maiin a awmtheih a, chuvangin Mizo tawng bakah kan chhehvel State danga midangte biak theihna turin Hindi thiam a ngai a ni a ti.

Lehkhabu ziaktu Pu C. Kamlova chu mi taima leh thiam ngah tak, a mi hriat chian a nih thu sawiin Pu Lal Thanhawla chuan Mizo History bu tha tak Hindi a ziah a tum thu a hrilh pawh in a phurpui hle thu a sawi a. Tunah hian Hindi zirtirtu 100 chuang fe neih mek a nih thu leh Hindi hi a pawimawh avangin thangthar leh mi tamzawk in an thiam nan hmalak chhoh mek zel a nih thu a sawi bawk. Hnam dang te’n Mizo chanchin Hindi a an lo chhiar theih nan leh tangkai taka hman tur in “ An Introductory Brief History of Mizo Tribe “ chu a tlangzarh a ni.

Dr Louis Hauhnar kaihhruai vawiin programme ah hian Prof. Sushil Kumar Sharma, (HOD) Hindi Department, MZU leh Dr. Bandana Bharti, Hindi Officer, MZU ten lehkhabu kamkeuna an nei a. Pu Liansailova, Vice Chairman, State Planning Board leh sawmbik thenkhat ten thusawiina an nei.

He lehkhabu ziaktu Pu Kamlova hi Pu C. Hluanchema (L) leh Pi J. Kilhliangi (L), Mampui khua te fa niin17th November, 1948 a piang a ni a. Rastrabhasha Mahavidylay, Aizawl i/c Principal niin kum 2008 khan a pension tawh a ni. Hindi leh Nepali tawngin lehkhabu 10 chuang ziakin tawngdangin Pathian hla engemaw zah a phuahin a letling bawk a. Dr. Laltluangliana Khiangte lehkhabu Ropuiliani leh Khuangchera Hindi a a leh chu zirlaite lehkhabu ah hman a ni.