Vawiin khan Chief Minister Pu Lal Thanhawla leh langa Aizawl lokal Union Cabinet Minister, Ministry of Social Justice & Empowerment Pu Thawar Chand Ghelot te chuan rualbanlo te hnenah an nun awlsam nan leh an mahni pui thei bungrua leh khawl hlanna programme Ramhlun Indoor Stadium-a buatsaih chu an hmanpui a, mi thahnem tak hnenah khawl leh bungrua te an hlan nghal a ni. He hun hi Parliamantary Secretary Pu K. Lalrinthanga pawhin a hmanpui a. Union Minister hi Pu Awanish K. Awasthi, Joint Secretary leh Pu Arun Karla, Under Secretary, Ministry of  Social Justice & Empowerment ten an rawn tawiawm a ni.

Chief Minister Pu Lal Thanhawla chuan hnam fing zawk ten heng pianphunga rualbanlo kan tih te hi mi bik a ngaiin kawng danga mi pangngai leh theihna danglam nei tiin Differently Abled leh Specially Abled ti ten an ko thin a, hetiang lamah hian keini pawh a hnam anga kan thanharh a ngai a ti a. Mizoramah pawh hetiang mibik te enkawl leh duhsak nachang kan hre chho zel hi thil lawmawm tak a ni a, Pathianin mihring te hi angkhat vekin min siam a, chuvangin angkhata in en a, duat leh hmangaih takin heng mi bik te hi kan enkawl a ngai ani, a ti a. Sawrkarin heng mi bik ten an chanpual dik tak an chan theih nan chak taka hma a lak mek thu sawiin harsatna an tawh te neitu rilru pua Sawrkar leh Department te pun zel turin vawiina pianphunga harsatna tawk kalkhawmte chu a chah a. Tualchung Department in an hmakhua atan Sawrkar Laipui nen tang hovin chak takin hma kan la dawn a, hetah hian nu leh pate leh khawtlang te tan hona kan mamawh dawn a ni, a ti. Union Minister chu a lokal hunah langa lokal lovin zanhnih khat chama hun hmangturina sawm a ni.

Union Minister for Social Justice & Empowerment Pu Thawar Chand Ghelot chuan kum hnih kaltaah a Ministry enkawl mek chuan tha thar thawhin pianphunga rualbanlo Persons with Disabilities (PWD) te tana nasa takin hma an lak mek thu sawiin vawiin ang PWD te tanpuina tura bungraw semna hun Camp hi ram pum hmun hrang hrangah vawi 4343 lai buatsaih a ni tawh a ti a. PWD te hmakhuana atana hmalakna hrang hrang leh hma lak mek thil hrang hrangte a sawi a. Chung zingah chuan piangphunga rualbanlo zirlai te hnenah 2014-15 atanga Scholarship pek tan te, kum 5 hnuai lam ri lama harsatna nei te tan cheng nuai 6 zel senga naupang 472 hnenah cochlear implant vuah sak te, Sign Language leh Braille zirna tura ruahmanna siam te, mi 44,000 hnenah cheng vaibelchhe 260 chuang apung tlem zawka loan pek te, mi 27,000 te hnenah cheng vaibelchhe 39 senga skill training programme buatsaih te leh chak taka Accesssibe India kaltlanga sawrkar leh pui punna hmun te PWD ten awlsam taka an pan leh an kal theih nana ruahmanna siam te a ni.  PWD te tana bungrua leh khawl pek te hi kum upa lam harsatna nei te tan pawh pek tura ruahman a nih tawh thu a sawi bawk.

Ministry of Social Justice & Empowerment in Social Welfare Department leh ruihhlo ngaite tana thawktu NGO-te sum leh grant an la pek hmabak chu thla 3 chhungin Ministry-in a pekchhuah tur thu a sawi a. Aizawl ah B.Ed. (Special Education) course chu nakum 2017-18 atanga tan anih tur thu a puang a. District tinah piangphunga rualbanlote chhinchhiahna tur survey leh an tana rampumah hman theih tur Identity Card thuhmun siamna atan cheng nuai 20 zel sanctioned anih tur thu a puang bawk. National Institute for Locomotors Disability (NILD), Aizawl Regional Centre building sak mek chu nakum April a zawhfel beisei anih thu sawiin he Regional Centre kaltlang hian chak takin hma PWD te hmakhua atan kalpui a ni dawn a ni, a ti. PWD te hmakhua atana sum chu Ministry in a pek hreh loh thu sawiin an mamawh te chu thlen zelturina chah a ni.

Vawiin programme ah hian pianphunga rualbanlo leh harsatna nei mi 370 hnenah bungrua leh khawl te sem a ni a. Heng Aids & Appliances te hi Visual Aids(Talking Calculator, Talking Table Clock, Rupee Checker with wallet), Daisy Player, Smart Phone, Hearing Aid, Kit for Intellectual Disability, Wheel Chair, Elbow Crutch, Auxillary Crutch, Prosthesis, Orthisis leh CP Chair te an ni.  

Union Minister Pu Thawar Chand Ghelot leh Ministry aiawhte hian tukin zing khan National Institute for Locomotors Disability (NILD), Aizawl Regional Centre tunah SCERT building, Chaltlang a awm mek chu an tlawh a, hnathawk te kawmin an mamawh leh harsatna te an zawt a. Room 2/3 pek belh an nih chuan chak leh zawka hna an thawh theih tur thu an thlen a, Minister hian heng an mamawh te hi pe turin State sawrkar a ngen nghal a. National Institute for Locomotors Disability (NILD), Aizawl Regional Centre hmun nghet tur hi MZU Campus, Tanhril ah sak mek a ni.

He ruahmanna hnuaia heng khawl leh bungrua te hi ram pumah mi 5,60,000 hnenah pek an ni tawh a ni. Sawrkar Laipui hnuaiah PWD te tana hna hrang hrang 15,694 hauhsak zinga 12,591 te hi hnawhkhah a ni tawh a ni.

 

Attachment

  • Loading attachment...