Vawiin khan Pu John Rotluangliana, Minister Food & Civil Supply & Consumer Affairs etc chuan Siamliana Hall, Mamit Charkawn-ah New Land Use Policy Horticulture leh Industries Department hnuaia tanpuina dawngtute a hlan.

He hunah hian Khuallian Pu John Rotluangliana Minister chuan NLUP chu mi harsa zawk leh rahbi tleute khaichhuahna tura hmanraw tha ber a nih avangin kalpui zel a ni dawn a ni a ti a, Tanpuina dawngtute chu a hmanna tur dik taka an hman leh hman loh chu an thu a nih rualin eizawnna ngialnghet mipui te’n an neih chu sorkar duh ber a nih avangin mahni hmakhaw ngai thiama kan tui zawng leh kan thiam zawng tak hmanga tanpuina kan dawn hi hmasawnpui ngei tura hman hi kan bat a ni a ti.

NLUP hmanga mi harsa zawkte tanpui hi thatchhiat inzirtirna ni lovin mahni thiam zawng tak hmanga eizawnna bul intan puina, taima tura inzirtirna a ni a ti bawk.

Khuallian chuan sorkar chuan mi harsa te khaichhuah chu a tum ber niin NEDP hmanga hmasawnna hna kalpuina turin cheng Vaibelchhe 250 ruahmanna a ni a ti bawk. Supply Minister hian gas a mizoram kan harsatna chu sorkarin hriain tun hnaiah motor permit 20 pek chhuah a ni a ti.

Vawiina tanpuina sem hi Industries department hnuaia Tailoring, Petty trade, Shoe repairing, Beauty parlour, Photography, Rice huller, Hair cutting, Steel fabrication, Blacksmith leh Automobiles thlangtu 3rd & 4 th phase te tan 2nd instalment pek an ni a, tanpuina semchhuah zawng zawng hi Rs 84, 37, 500/- a ni. Tailoringah hian khawl pathum flora, swing machine leh over lock te pek tel an ni.

Horticulture Department Mamit Circle ah Serthlum, Kuhva, Lakhuihthei thlangtu 3rd & 4th phase te tan 3 instalment sem a ni bawk a, 3rd phase ah Kuhva, Serthlum leh Lakhuihthei thlangtu mi 47 te tan tanpuina 278500 sem niin 4th phase ah Lakhuihthei, Serthlum leh Kuhva thlangtu mi 44 te tan Rs 269000.00 sem ral a ni bawk.

Tanpuina sem inkhawm hi Pi H. Lalchhandami, SDO(S) in a kaihruai a ni.

Pu John Rotluangliana, Minister hi Sorkar officials te leh MPCC hruaitute’n an tawiawm a ni.