Mizoram puma Rural Development Department hnuaiah Social Audit Unit mi rawih, District Resource Person-te tan ni 30 chhung awh tur "Social Audit Capacity Building Plan” training chu nimin (2.11.2016) chhun dar 12 khan SIRD Conference Hall, Durtlang ah neih tan a ni.
He training programme hi Pi Maria C.T Zuali, Director, SIRD & PR chuan hawngin, Sorkar laipui scheme zingah thlenna tur ni lo leh mirethei te hnena thleng lo tam tak a awm thin thu leh, dik taka kalpui anih theih nan Social Audit neih pawimawhzia a tarlang a. Sorkar laipuiin ngawrh taka kalpui a tum thu sawiin, Social Audit chu mi dik lohna hailangtu mai nilovin, a dik lo lai siamthatna hmanrua a nih thu leh, trainees-te chu mipui leh sorkar zarah tha taka kalpui thei tura midang zirtirtu tur an nih thu a sawi bawk.
TraininG hi Pu Khuangthansanga Pakhuangte, Dy. Director, SAU leh Principal, ETC, Thingsulthliah ni bawk chuan a kaihhruai a ni. Mizoram Sorkarin Social Audit Unit hi Director hrang neiin kum 2012 khan a din a. Mizoramah District Resource Persons post 64 a awm a, chung zinga post 58 chu hnawhkhah a ni. DRP te hi Social Audit an neih chhungin nitin cheng 500, TA/DA leh Actual Travelling Cost-te pek an ni thin a. SAU din hnuah Social Audit hian khaw 362-a Audit tawh a ni.
He training hi National Institute of Rural Development, Hyderabad in Tata Institute of Social Science, Mumbai nena tangduna an buaipui a ni a. Mizoram ah SIRD leh SAU in lo puiin, thla khat chhung course training chhuak te hi India ram pumah Social Audit ti thei vek turin Certificate pek an ni ang.
