Vawiin khan Chief Minister Pu Lal Thanhawla’n CYMA Conference Hall, Tuikhuahtlang-ah Mizoram College Teachers’ Asssociation (MCTA) Annual General Conference vawi 38-na chua khuallian niin a hmanpui.

Chief Minister Pu Lal Thanhawla chuan zirtir hna chu hna zahawm leh ropui mawhphurhna sang tak keng tel anih thu te sawiin zirna in a tum kawng engkima mihring te tih hmasawn hre chiang tur ber in ni a, in mawhphurna leh pawimawhna te hi a sang hle a ni, a ti. Zirtirtu abik takin college zirtirtu te chu naktuk, naktipa ram leh hnam tana khua leh tui tangkai leh tha leh mi rinawm chherchhuak tu in ni a tiin kawng engkimah, incheina lam a ni emaw, zuk leh hmuam lama insum a ni emaw, hmangchang hriatna leh hawihawmna lam a ni emaw, in zirlai te tan entawntlaka in awm a tul a ni, a ti a. Zirlai naupangte te hnenah Zonun ze mawi zirtir a, chhawm nun a pawimawh leh a tul zia te hrilh nawn fo turin a chah bawk a ni.

Pu Lal Thanhawla chuan college zirtirtu ten UGC hlawh an lak thu sawilangin state sawrkara hnathawh te aiin in dinhmun a tha a, chuvangin Sawrkar hian in lakah beiseinna sang tak a nei a, hei hi hre renga zirlai te in zirtir leh enkawlna kawnga theihtawp chhuah zel turin ka chah duh che u ni, a ti. Zirna sang zawka te tana inkaihhruaina dan mumal tak awmsa Code of Ethics UGC in a phut te, abik takin zirlai naupang nu leh pate leh zirtirtute inkawmhona, parent-teacher meeting te chu tihhlawhtlin a pawimawh thu a sawi a. Thiamna sang zawk degree te chu hming hmaa dahna atan chauh hmang lova anihna ang tak – zirbinga leh hemi lam lekhbhabu leh thuziak lama tan lakna tur a ni tiin academic exercise lam abik takin Seminar leh Workshop te hi zirtirtu leh zirlai te tan a tangkai zia hria a heng buatsaihna kawngah tun aia nasa leh zawka tan la turin ka beiseiin ka chah duh che u ni, a ti.

Zirna sang zawk tihchangtlunna RUSA kal dan chu duhthusam a nih loh avangin a tih that dan ngaihtuah mek a nih thu sawiin hmun tam taka zirna in sang zawk neih belh aiin zirna in changtlung tak, ram pawn thleng zirlai chhawrtlak leh hmantlak chherchhuak thei kan neih a pawimawh zawk a ni, a ti. Mizoram chu ram thang mek anih angin Sawrkar chuan zirna leh hriselna hi a bik takin a ngaipawimawh a, heng hi te tih hmasawn leh tihchangtlun nan theitawp a chhuah mek thu a sawi bawk.

MCTA inkhawmpui ah hian kualzahawm Commissioner & Secretary, Higher & Technical Department, Pu Benjamina pawhin thusawiin zirlai hmantlak chherchhuahna lama tanlakna tur a awm thu sawiin chutianga tanla turin zirtirtute a fuih a. He hun hi Director, H&TE Department Director pawhin a hmanpui a. Pu H. Lalnunmawia, Vice President, MCTA in hun kaihruaiin MCTA President, Dr. P.L. Ramliana in inlawmna thu a sawi a, Dr. C. Lalremruata, General Secretary, MCTA hnen atangin Secretary’s Report ngaihthlak a ni. An member boral mi pathum sunna hun an hmang bawk a ni.

Mizoram Sawrkar hnuaia hian College 24 a awm mek a, hengah hian college zirtirtu a ngheta thawk 626 an awm mek a, part-time a thawk 180 leh contract a thawk 37 an awm mek bawk a ni.