Vawiin chawhnu hian Minister of State for AH & Vety Pu C. Ngunlianchunga chuan Khawlailung khuaa Mizoram Rural Bank thar, Mizoram Rural Bank Branch 81 na tur chu a hawng a. Bank Account la nei ngai lo khawtlang hruaitute thlanchhuah mi 10 te chu Rs 1000 theuhvin Account thar a hawn sak nghal bawk.

Bank thar lawmna inkhawm, Khawlailung Community Hall a neihah Pu C. Ngunlianchunga chuan, Khawlailung khuain mel lung pawimawh tak a phun nia a tel ve thei chu lawmawm a tih thu a sawi a. Tunlai khawvelah bank tel lova hmasawnna kalpui a harsat tawh avangin Khawlailung leh a chhehvel khuate tan malsawmna ropui tak ani, a ti a. Vawiina mite tan chuan Bank hi kan Tungchaw, kan Thul, kan Thingrem a ni tawh a. In rohlute hetah hian lo dahkhawl ula, a bo ve thei tawh lo a ni, a ti. Lakluh a tlem a nih pawhin a tlem ang anga bank a dah zel mai chu dinchhuahna bul nia a hriatthu, ama lo tawn tawh ngei te sawiin mipuite chu sumkhawl nachang hre turin a ngen ani. Sawrkar atanga tanpuina awm thin te pawh Bank Account kaltlanga inpek zel a nih tawh avangin Bank Account neih tum theuh turin a fuiha, mi rinawm te tan Bank chu dinchhuahna tur sum puk tur awmna anih laiin mi rinawm lo tan erawh Jail kawngkhar, neih zawng zawng channa bul a ni ve hlauh thei bawk. Hei hi hrerengin he bank thar hi tangkai taka lo hmang turin ka ngen che u ani, a ti bawk.

AH & Vety Department atanga vawkvulh pung tur Khawlailunga chhungkaw 6 an thlanten tha takin an vulh tih a hmuh avangin lawmthu a sawi a. Fu ching tam khua an nih avang leh Fu tui phul an paih thin chu Vawk chaw tha tak anih vangte, fu hnah leh a herna fe chu Bawng chaw tha tak a nih bawk avangin Vawk leh Bawng vulh lamah tan la thar se a duh thu khawtlang mipuite chu a hrilh bawk a ni. Hengte bakah hian Minister chuan, tunlaiah leilung chhiatna hrang hrang avangin nunna hlu tak kan chan ta fo mai. Heng; tuilian, leimin, tuihawk, thli, tek leh chhiatna thlen thei kawng tinrengah naupangte hnena zirtirna lo nei uara, kan inven theihna kawng hrang hranga kan fate hrilh uar turin nu leh pa kal khawmte chu a chah a ni.

He hunah hian bialtu MLA Pi Vanlalawmpuii Chawngthu, Mizoram Women Commission Chairman ni bawk pawhin thusawina hun a hmang a. A bial chhunga bank thar a awm belh chu lawmawm a tih thu a sawiin, Khawlailung chu model village anih avangin bank hi awm ve ngei se a duh thin thu leh, a awm ngei theih nana thuneitu hrang hrang a biak kual nasat thu sawiin Chief Minister hnen thlenga a kal thu a sawi a. Chutihlaiin bank thar hawnna atana pawimawh ber chu mipuite an ni a, Khawlailung khaw mipui, taima taka hnathawka sum leh pai thawk chhuakthinte thawhrah ani, a ti a, Khawlailung mipuite chu an bank thar hmang tangkai turin a ngen a ni. Khawlailung vanneih zia sawiin MLA chuan, sawrkarin he khuaa hmasawnna hna a thawh zawng zawngte hi a tam tawh em em a, hetiang anga khaw vannei dang hi an awm tawh kherin a rinawm loh a ti; heng sawrkar duhsakna zawng zawngte hi hmang tangkaia, duat taka lo enkawl zui tlat turin a chah bawk a ni.

Pu. C. Malsawma, Senior Manager, Mizoram Rural Bank Head Office pawhin thusawina hun hmangin, MRB chu Mizorama bank branch nei tam ber an nih thu leh kumtin crore 2500 vel an chet kuak tir thin thu a sawi a. Nikumah crore 24 an hlep thu sawiin kum engemawchen hloh chunga an lo kalpui tawh zawng zawngte an rulh vek tawh bakah hlep crore 75 zet an neih tawh zawk thu a sawi a ni. Tun hnuah phei chuan kum engemaw chen chu India rama Rural Bank tha ber te zinga an awm tawh thu a sawi bawk. Pu C. Malsawma hian, Corporate Social Responsibility atanga an lo luanchhuah tawhna hrang hrangte pawh a tarlang hlawm bawk ani. Khawlailung mipuite chu an bank thar lo dawr tha tur leh a tulna apianga lo thawhpuia lo tanpui thin turin a ngen a ni.

Pu K. Thangbawiha, VCP Khawlailung pawhin thusawiin, an khuain Bank thar an nei ta mai chu lawmawm a tih thu leh Khawlailung leh a chhehvel khuate tan malsawmna ropui tak, kawng tam taka hmasawnna thlentu tur a nih ngei a beisei thu a sawi a ni. Tin, an khawtlangin Bank an neih theihna tura hmalak saktu Pu CL Ruala, MP leh Pi Vanlalawmpuii Chawngthu, Bialtu MLA, Serchhip DC Dr. Lalrozama leh DRDA Project Director kalchhuak ta Pi Teresy Vanlalhruaii leh Mizoram Rural Bank hotute chungah lawmthu a sawi bawk.

Khawlailung khua hi Lok Sabha MP, Pu CL Ruala'n Model Village (SAGY) atana a thlan hmasak ber khua niin Serchhip District a awm a ni a. 2011 Census a a lan danin he khuaah hian in 523 awmin mihring 2538 an cheng mek a. Kurtai tharchhuak tam khua an nih avanga hriat hlawh tak khua an ni.

Vawiina MRB Branch hawn thar hi Manager pakhat leh Assistant pakhatin an thutchilh nghal dawn a ni.

Minister hian Account thar a hawnsak te hnenah hian Passbook a hlan nghal a ni.