Vawiin khan Industries changtu Parliamentary Secretary Pu Joseph Lalhimpuia chuan Agro Base Food Processing Industry (ABFPI) hnuaia State Level Entrepreneurship Motivation Workshop Chanmari YMA Hall-a neih chu khuallian niin a hmanpui.
Parliamentary Secretary Pu Joseph Lalhimpuia chuan thu sawiin kan ramah nationalized bank-te’n a rama cheng mipuite hnenah loan pek an harsat thin chu a pawiin a lungchhiatthlak hle a ni, a ti a. Bank official-te chu theihtawp chhuah tur leh, tun financial year ral hmain Prime Minister Employment Generation Programme (PMEGP) hnuaia task force committee thlan beneficiary-te hnenah a tam thei ang ber loan sanction turin a ngen. Tun financial year tawp dawn thlengin PMEGP hnuaia margin money kan ram ta tur chu hmun thuma thena hmun khat pawh sanction a la ni lo chu manganthlak a tih thu sawiin, khuallian chuan Bank hotute chu mipui te eizawnna kawng siam sak leh dal thei din hmunah an ding a ni tih hria se a duh thu a sawi. Bank loan pek chungchangah hmasawnna hmuh ngei a beisei thu sawiin, duh thu a sam loh erawh chuan high level thlenga theih tawpa aupui a tum thu a sawi bawk.
A tawnhriat chungchang sawiin, Pu Joseph Lalhlimpuia chuan loan hmang tangkaia ei a lo zawn thin dan leh a hun takah a rulh leh thin avanga mi rin a kai leh thin thu a sawi a. Workshop chhim tura kalkhawm zawng zawngte pawh loan an lak reng rengin a rulh leh lam pang chu an tih makmawh a ni tih hre turin leh mi dang an hnua loan lak tumte kawng daltu ni lova malsawmna ni zawk turin a fuih bawk. Tunah hian khawthen khatah Handloom training thla li chhung pek mek niin, an training zawhah khawl nen tanpuina pek an ni thin a, mipuite chu theih tawp chhuah ve thin turin a chah. Sawrkar atanga tanpuina (subsidy) la sia ti tha leh peih tak tak lo chu ram hmel tichhetu mai an nih thin thu a tarlang bawk.
He hunah hian SBI Aizawl Lead Bank Manager Pu P. Dutta pawhin thu sawiin, beneficiary-te chu an project siamte marketing lamah kawng awm leh awm loh ngaihtuah hmasa tur leh an sum hmuh ang ang chu an project thilah chauh hmang thin turin a chah.
Workshop hawnna inkhawm hi Assistant Development Officer (REI) Pu Laldula Sailo-in kaihruaiin, KVIC Director Pi Rualkhumi’n inlawmna thu a sawi a. MKVIB Chief Executive Officer Pu Kaisangzuala’n lawm thu a sawi bawk. Workshop hawn a nih hnu hian khuallian hian agro based thil siamte chu a en kual nghal a ni.
Workshop hi ni khat awh niin, Mumbai atanga ABFPI Development Officer lo kalte leh Ephraim Herbals atangin Pu K.C Vanlalruata leh Zo-Ei Unit leh Sugar Cane Grower Association President Pu H. Malsawma leh Reiek Multi-Farming Co-operative Society-te chuan resource person niin an zirtir a; zawhna leh chhanna hun hman nghal a ni bawk.
