Chief Minister Pu Lal Thanhawla chuan 'Kan tawng mawi tak hi thang thar ten an tihchhiat hma in mithiam ten a ven dan siamin i humhalh ang u' a ti. He thu hi vawiina Pi Buangi Sailo Padma Shree dawn lawmpuina inkhawm Vanapa Halla neiha a sawi a ni.

Pu Lal Thanhawla chuan Mizo tawng hman danah thang thar ten dik tawk lo leh duhtuilo taka an hmang thin chu a ngaimawh thu sawiin, thu leh hla lama mithiam ten thang thar te hi Mizo tawng hman dan dik zirtir se a duhthu a sawi a. Thu leh hla lama mibik, Pi Buangi Sailo chu midangte zinga amah Padma Shree dawng tura thlan a ni hian a chungchuanna a tichiang hle a ni a ti a. Thu leh hla a phuah atang te hian a kum upa tawh mahse tar tum miah lo a nihzia a tilang chiang hle bawk a ni a ti.

Pu Hawla chuan Pi Buangi chu thlarau engemaw tak nei, a hla han sak tawh hi chuan kan lam mup mup mai thin a ni a ti a. India sorkar chawimawina dawng pha a ni hi kan lawmpui a, chawimawi hi a phu a ni a ti a. Chief Minister chuan hetiang chawimawina Mizo in an dawn hian Zoram pum an chawimawi a ni tiin, Pi Buangi chawimawi leh lawmpui nachang an hria chu lawmawm a tih thu a sawi a.Thu leh hla lama mi tui miten an rawn tawiawm chu thu leh hla a tih changtlun phah ngei a beisei thu a sawi bawk a ni.

Khualzahawm Pu PC Zoramsangliana, Minister for Arts and Culture chuan Pi Buangi chu a lusun khawhar laiin thu leh hla in a rawn kaiharh a, chu chuan Zoram bakah India ram rawn nghawr chhuakin, kum upat hnuah Padma Shree hial dawng theia a awm hi a ropui a, a mak a, a chhuanawm a, Mizo hmeichhiate mai nilovin, Mizo hnam hi a chawimawi a ni a ti.

Kum 77-na hmang mek, Pi Buangi Sailo hian kum 2006 khan Mother Teresa Award alo dawng tawh a, India Hmarchhak mite zinga dawng hmasa ber a ni nghe nghe a ni. Hei bakah hian India ram puma hmeichhe 5 te hnena hlan thin, Shree Shakti Puraskar Award pawh kum 2007 khan hlan a ni bawk. Pi Buangi Sailo hian thu leh hla 200 dawn a phuah tawh a, lehkhabu 9 alo ziak tawh bawk a ni.

Inkhawm hi Pu Lalthangfala Sailo, President, Mizo Letters of Academy in a kaihruai a. Prof. Laltluangliana Khiangte in lawmna thu a sawi bawk a ni.