395/2026-2027

Aizawl the 6th May 2026: Vawiin khan M. Suaka Hall, Durtlang Presbyterian kohhranah Samaritan Association for the Blind Special Blind School ten an school Silver Jubilee an lawm a. Chief Minister Pu Lalduhoma chuan khuallian niin a hmanpui a, Pu Vanlalhlana, PWD Minister, bialtu MLA ni bawk chu khualzahawm a ni.

Thusawiin Chief Minister chuan, taksa lama harsatna lian tak, chhuanlam remchang tak nei chunga zirna lama hlawhtlin tum naupangte an chhuanawm thu a sawi a. Thinlung hrisel tak pu zui tlat tura chahin, "Kan thinlung a hrisel chuan harsatna nia lang thil tam tak hi kan tan remchanna a lo ni fo zawk thin", a ti.

Mizoram mipui tam zawk chuan he School hlutzia leh tangkaizia hi an ngaihtuah ngai lo mai thei. Nimahsela, kan unau, Mit thalote tana a hlutna hi sawifiah thiam phak loh khawpa hlu a ni.

He school a lo awm hma zawng kha chuan Mizoramah mit thalote puala zirna in kan nei ngai lova. Samaritan Association for the Blind ten theihtawp chhuahin in han bei a, sorkar laipuite dawrin, Grant te in hai chhuak a, school in din ta a. Mit thalote tan beiseina meichher in rawn chhi eng a. An beisei ang ngeiin zirna tha an hmu a. Vawiinah chuan he School atanga zirchhuak mi hlawhtling tak tak sawi tur an lo awm ta fur mai a ni.

Sorkar pawhin a hlutzia a hriat avangin Adhoc Status a pe a. Zirtirtu a attach- a, tun kan sorkar hian Middle Section bik hi Provincialize tura ngaihtuah tur zingah kan dah a, PPP mode-a kalpui pawh a tha zawk thei, a ti.

Hostel Building pakhatah mipa leh hmeichhia in la awm khawm avangin Girls Hostel in mamawh tih kan hria a. Handholding atangin Hostel sakna tur hi Rs. 50 lakh kan ruahman fel tawh a ni.

Zirna lama in harsatna te, in mamawh dangte pawh inthlahrung lovin bialtu Minister hnenah te, Education Minister hnenah te, Social Welfare Minister hnenah te, ka hnenah pawh rawn sawi zel ula. Sorkar anga kan tih theih chi a awm a nih chuan tumah kan tlanchhe lo turah ka ngai a ni.

Kan chhehvel ramtea Mizoram tihmingthatu he school lo din a, tha taka enkawltu Samaritan Association for the Blind te chungah hian kan lawm em em a. A theih ang anga hmalakpui kan inhuam a ni, a ti.

Naupangte hnena Chief Minister thuchah tlangpuite:

1. An taksa lama harsatnate avanga beidawng mai lova, mi hlawhtling nih tuma zirna kawng an zawh avangin lawmthu a hrilh.

2. Digital Literacy ngai pawimawh turin a chah a, an zirlaipui dangte nena rualkhai taka an kal theihna hmanraw tangkai tak chu nal taka computer leh digital assistive device in hman theih hi a ni, a ti.

3. Rilru hriselna ngaipawimawh turin a chah a, Bible chuan thil dang zawng aia veng tha tura min chah chu kan thinlung hi a ni a, “nunna lo chhuahna” a ti a. Kan thinlung a hrisel chuan kan hmaa harsatna nia lang tam tak hi remchanna an lo ni zawk thin. Tunlai khawvelah chuan Problem tih tawngkam hi an hmang duh tawh mang lova Opportunity an ti tawh zawk thin. Thinlung hriselte tan chuan Problem hi Opportunity a ni reng a ni, a ti.

4. Tihpalh thila Pathian siam in ni lova, chhan leh vang ropui tak neiin a din zawk che u a ni tih hi ring ngam ang che u. In hmaah hlawhtlinna chang tawh in ute sawi tur tam tak in hriain ka ring. Nangni pawhin in ti ve thei ang tih hi ka ring a ni, tih te an ni a.

Khualzahawm Pu Vanlalhlana pawhin thusawiin, he school ka biala a awm hi ka chhuang a, a enkawltute chungah ka lawm a ni. In tan tih theih ka neih phawt chuan ka theihtawp ka chhuah zel ang. Tunah pawh MLA Fund atanga thawh theih project rawn nei ula, kan thawk dawn nia, a ti a. Tanpuina sum a hlan a ni.

Silver Jubilee lawmna inkhawmah hian Pastor Gospel Thanmawia chuan hunserh a hmang a. Pu RK Vanlalringa, Executive Secretary, Samaritan Association for the Blind chuan report a pe a. An association hi kum 1990 a din a ni a, Special Blind School hi kum 2001 May thla atanga bul an tan a ni. A kum hmasa berah zirlai 16 an awm a, a hnuah chuan kumtin zirlai naupang 30 nei ziah ang an ni a. Kumin bikah hian 35 awmin Mizoram bakah Tripura, Manipur, Assam leh Myanmar atangin an lo kal a ni. School-ah hian Primary atanga High School thleng a awm a, HSLC hi kum 17 chhung zaa zain an pass tawh a. He school-a zirchhuak mi 22 in sorkar hna an thawk tawh a ni. Sorkarin Adhoc status a pe a, Mathematics zirtirtu a attached a, zirlaibu leh an mamawh dang a tum thin bawk.

Zirlai naupangte hian mi thahnemngai tanpuitu (sponsor-tu) mimal, pawl leh kohhran an nei hlawm a. Chief Minister Pu Lalduhoma pawh hian naupang pathum a sponsor mek a ni. Heng  zarah vawiin thlengin tluang takin lehkha hi an zir theih phah nia sawi a ni.