School Education Minister chuan “Kan tlawmngaihnate hi kan hmasawnna leh changkannaah vawng nung chho zel ila chu chuan kan hnam a din chhuahpui ang,” a ti. He thu hi Zirtawpni (24.02.2017) zana Ramthar Veng YMA Hall-ah nikum ni 4.10.2016-a Ramthar Veng naupang pali Theihai lui kawr tui hawkin a lak boralte hriarengna leh sunna Music Video “Bungdawntuai”, Ramthar Veng Branch YMA Zaipawl ten an buatsaih  a tlangzarh naah a sawi a ni. 

School Education Minister chuan hmun hrang hrang a tlawh kual leh awmtawhnah pawh Mizo te aia tlawmngaihna nei a hmuh ngai loh leh a hriat loh thu sawiin, Mizo nih hi a lo nawmzia a sawi a. YMA chu kan hnam in chhiat tawh nikhua ahte kan tangkaipuizia sawiin, heng kan tlawmngaihna te hi kan hmasawnna leh changkanna ah hian vawngnung chho zel ila chu chuan kan hnam a din chhuah pui ang, a ti. Pu H. Rohluna chuan kan Mizo nun ze mawi hi chawi kan zel a tul a, kan changkanna te hian kan Pipute nun ze mawi min hlan chhawn hi kal bo pui lovin ti vul zual zawk se, a takin nunpui ila kan hnam a chawi kang zel ang, a ti a. Music Video siam tura tha thawhtute zaipawl member-te chu an inpekna ah fakawm a tih thu a sawi bawk. 

He hunah hian Pu Lalthanliana, Bialtu MLA leh AMC Ward No. IV Councillor Pu Laltlanzova Khiangte pawhin thusawina hun an hmang a ni.