3383/2022-2023

Dated Serchhip, the 27th January, 2023: Vawiin khan Serchhip District Fire Prevention Committee te chu Pu Lalmuansanga Ralte, Addl. DC hovin DC Meeting Hall ah an thukhawm a. Kangmei Ven Hapta 2023 hman dan tur leh kumin thal chhova kangmei laka inven dan turte an sawi ho.

He hunah hian Member Secretary Pu Lalbiakchama Chawngthu, DFO, Thenzawl chuan kum kalta lama an hmalak dante leh kumina State Level Sub-Committee rorel tlangpuite sawifiahna a neia, chumi hnuah Serchhip district a hmalak dan tur hi an sawi ho a ni.

Kumina Lo hal theih hun hnuhnung ber atan State Level Sub-Committee March ni 15 a ruat a, hei hi Serchhip district ah khauh taka ken kawh ni se an ti a. Fire Prevention Week atan hian February ni 6 atanga ni 10 inkar chu ruat a nih angin a hawnna inkhawm hi February ni 6 ah buatsaih ve ni se an ti. Kuminah hian kangmei ven lama hma la tha intihsiakna, district inelna leh district chhunga khawtin inelna buatsaih leh a ni ang a, Serchhip district ah pawh khaw inelna hi kalpui ve tur a ni ang a, intihsiakna lawmman la phak chiah lo thawk tha si khuate hnenah pawh lawmman buatsaih sak an ni bawk ang. Nitin chanchinbu, kangmei venna lama thawk tha thlan chhuah hnenah hriatpuina (recognition) pek leh ni se an tih bakah kangmei laka invenna lam inzirtirna uar taka kalpui leh ni se, an ti a ni.