3382/2022-2023

Aizawl 26th January 2023: Vawiin khan School Education Minister Pu Lalchhandama Ralte chuan Aizawl Theological College Durtlang-ah Republic Day a hmanpui a, zingah hnam puanzar pawtpharhin zirlaite leh thawktute hmaah Republic Day thuchah a sawi.

Minister Pu Lalchhandama Ralte chuan kum 1950-ah India ram chu mipuite ro rel theihna ram a lo ni ta a, vawiin Republic Day-ah hian British awpna laka zalenna suala inpete kan hrereng a, kan ram zalenna hnuaiah hian hruaitu hmasate duhthusam zuia khua leh tui tha tak nih hi kan mawhphurhna a ni a ti. Mizoram sorkar kal lai mek chu a din tirh phat atangin hriat lawk loh khuarel chhiatna chi hrang hrangin a bawhbuai a, Mizoram khawchhak lamah lirnghing vawi engemawzat a nghing a, covid-19 hripui a leng a, fall armyworm te, bird flu te, vawk pul hri te a len bakah thenawm ramri buai te, Myanmar leh Bangladesh ram buai avanga raltlan dawnsawn ngai te kan hmachhawn a. Heng harsatnate hi hmachhawn mah ila, Engkimtitheia chuan Mizoram sorkar chu heng karah hian hnehna nei thei turin a hruai a, chakna min pe a, malsawmna min dawn tir bawk a. Kohhran leh mipuite tawngtaina azarah hmasawnna hna thawk theiin leh tum ram lam panin sorkar chu a kal thei a ni a ti.

Pu Lalchhandama Ralte chuan khawvel hmasawnna danglam chak tak karah kan cheng mek a, information technology leh social media thang chak takin min tuam mek a, heng hmanraw chak tak te hi kan khawsaknaah mipui rilru inhuat nan leh thendarh nan sualin a hmang ve mek bawk a, heng karah hian inremna leh inthian thatna a awm theih nan ringtuten Lal Isua zirtirna kan puanchhuah a ngai a ni a ti. 

Aizawl Theological College-a thawktute leh zirlaite chuan Minister hi an kawm zui a, he hunah hian Minister chuan  Academic session April - March 2023 chu India rampum kal dan anih avangin thlak tumna a awm lem lo a ti a, sorkar primary school 320-ah pre-school hawn a ni tawh a, hawn belh zel tum a ni a ti bawk. Thalaiten hnathawh tur an neih theih nan LESDE-in kawng hrang hrangin hna a thawk mek a, Japan rama thawk tur thalai 50 India ram atanga thawn chhoh turah mi 20 chu Mizoram atangin kaltir an ni dawn a, LESDE-in thalaite saltanna chhanchhuak turin tan a la mek a ni a ti bawk.

Aizawl Theological College-ah hian Pathian thu zirlai BD, M.Th leh D.Th an awm mek a, zirlai 194 leh thawktu teaching leh non-teaching 43 an awm a ni.