3381/2022-2023

Hnahthial the 26th January 2023 : Ramchhung hmun dang rualin vawiin khan HDFA Turf Ground Hnahthial-ah Republic Day Vawi 74-na lawmna neih niin District Bawrhsap Pu R.Lalremsanga chuan Hnam Puanzar pawtpharhin Parde Contingent 11 ten chibai an bukna a chhang let a, Faina kawnga inelna hrang hrang lawmman sem a ni bawk.

Khuallian Pu R.Lalremsanga chuan India ram chu British sorkar awpbehna hnuaiah kum tam tak a awm hnuin 15th August, 1947 khan mahnia ro inrel ram Independent Country a nih thu leh January 26th, 1950 khan India dan pui Consititution chu peih fel niin hman tan a nih thu sawiin "India dan pui danglamna leh ropuina em em chu mipui rorelna (Democracy) rama India siam a nihna hi a ni" a ti.

Hnahthial District chu August 2019 khan a takin kalpui a nih thu sawiin "Hnahthial District naupang te hi District hmasawn leh changkang a nih theih nan Sorkar Official, NGO, Kohhran leh mitin te hian chanvo leh mawhphurhna kan nei a ni tih hi i hre thar leh theuh ang u" tiin ei leh bar kawnga intodelh tur te, ziak leh chhiar thiamna kawnga tan la thar tur te, faina leh thianghlimna kawnga District dang te entawn ni tur te inpekna thar nei theuh turin mipuite a ngen a ni.

Hnahthial District tihchangtlunna tura Sorkar hmalakna hrang hrang a tarlan bakah Hnahthial District bawrhsap chuan Hnahthial District chhunga kawngpui (NH 54) chu double lane turin BIPL leh ABCI company ten chak takin hna an thawk tih a sawi a, hmun thenkhatah Company-te harsatna siamsak an awmin hriat a ni a, hei hi a pawi hle maia District Administration chuan tluang taka hna a kal theih nan dan angin hma a la zel dawn a ni tiin Hnahthial District chhung Village Council 21 Raltlan an khawsa mek tih a sawi a, heng raltlan te hi sorkar duhdanin chhinchhiahna ID Card siamsak vek an nih thu leh chhawmdawlna chi hrang hrang pek an nih thu a sawi bawk a ni.