State Level Fire Prevention Committee duan angin Mizoram pumah Fire Prevention Week Kangmei ven chawlhkar chu vawiin chawhma khan I & PR Auditorium-a inkhawm buatsaihah Mizoram Chief Minister Pu Lal Thanhawlan a hawng.

 

 

Chawlhkar hawnna thuchah sawiin Chief Minister chuan Mizo Hnam zepui tlawmngaihna leh neitu rilru putna thinlung nen kangmei ven hi kan thawh chuan kan hlawhtling ngei ang a ti. Nikumah khan kum hmasa lam atanga mau tam nghawng leh thal ro lutuk avangin Mizoramah kangmei nasa takin a chhuak a. Ramngaw, nungcha, in leh lo nunna hial tam tak kan chan a ni tiin kuminah pawh hian khawchin leh thal khawro dan enin nikum aia nasa zawka tan lak a tul dan CM hian a tarlang a. Chuvangin Mizoram chhunga tlangram lo neitute tan pawh kum dang zawng aiin lo hal hma nise tiin sorkar-in ngaihdan a siam a. Zoram hmun hrang hrangah lo vah hun inrual thin lo mahse a tlangpuia lakin February thla chhung ngei hian lo leh leipui hal tur nei zawng zawngte chuan hal vek hman se, chu chuan thal khawro lutuk avanga kangmei chhuah palh a ven thei zawk beisei vangin he thu tlukna hi siam a ni, a ti. Chief Minister chuan Mizoram chhungah ram leilung fa dik tak nilo vei vak (floating population) mi nuai hnih lai an awm a rin thu sawiin heng mite hian tualchhung mite thawh duh loh leh thawh peih loh te thawkin hmun tinah an in zarpharh a. Ramngaw tha lai te ti kangin an nei zui mai bawk thin nia a hriat thu leh state chhunga suahsualna tam ber pawh hi heng mite thil tih hi a ni a ti a. Zu chhia leh ruihho chi tinreng in kan thalaite an suam bakah a hring hran ngei pawhin mi an rawk ngam tawh a ni a ti a. Chuvangin tualchhung mi, ram leilung fa dik takte hian kan mawhphurhna hria a ramngaw, nungcha humhalh kawngah te, khawtlang nun siam that kawngah te kan thanharh a hun ta tak zet a ni a ti.

Pu Lal Thanhawla chuan ramngaw, nungcha humhalh kawngah hian amah ngei chu a naupang tet lai atanga zirtir anih dan tarlangin kan state chhunga primary school level atang hian hetiang hi uar zawka inzirtir tul a tih thu leh chutiang ti tur chuan Education Department pawh thu rawn tawh thu vawiin inkhawmah hian a sawichhuak a ni.

Vawiin inkhawm kaihruaitu Environment & Forests Minister Pu H. Rohluna chuan kangmei ven te, ramngaw leh nungcha humhalh kawngah te hian Forests Department te chu a mawhphurtu bulpui nimahse he hna hautak tak hi mipui leh tlawmngai pawl te thawhpuina lo chuan an tlin bik loh dan a sawi a. Kum kalta lama an thawhhona tha takte chu chhunzawma kuminah pawh theih tawp chhuahpui ah tlawmngai pawl, chanchinbumi leh mipui mimir a sawm a ni.

Sub-Committee on State Level Fire Prevention Committee Chairman leh Parliamentary Secretary to Chief Minister Pu Lal Thanzara pawhin thu sawiin tunlai khawvel nundan changkang tawh taka kan din laia kangmei ven kawnga in hrilhhriat la ngai fo mai chu thil vanduaithlak tak anih laiin kan ram mamawh leh thil tul anih avang hian mi zawng zawng kan tan tlan erawh a tul a ni a ti a. District leh Village Level-ah te he kangmei ven pawimawh zia hi tlangau pui zel tur a nih dan te, kangmei chhuah thulha hmalak dan tur hrang hrang in hrilhhriatna hun hman a nih dan tur te kalkhawmte hnenah hian a tarlang a ni.

Central YMA aiawhin an Vice President Pu C.Zoramliana’n Nungcha Humhalh kawnga YMA te chet lak dan tur tlangpui a sawi a, Krismas leh Kumthar laia halpuah khap hlawhtlin chungchangah a tihlawhtling tu ber chu sawrkar a ni zawk a ti.

Fire Prevention Week hawnna ah hian sawm bikte an kal tha hle a. Chung zingah chuan Law Commission Chairman Pu R.Lalrinawma, KVI Board Chairman Pu K. Lianzuala, ZIDCO Chairman Pu Lalrobiaka te pawh an tel a. PCCF Dr. S.S. Garbyal in thuhma sawiin CCF leh Fire Prevention Committee Member Secretary nibawk Pu Rosiama Vanchhong in lawmthu sawiin hun hnung a khar a ni.