Mizoram sorkar State Level Fire Prevention Committee-in a rel tawh angin Mizoram puma kangmei ven chawlhkar chu February 18 -23 chhung hian hman tur a ni a, he chawlhkar hi vawiin khan I&PR Auditorium-a inkhawm buatsaihah Mizoram Chief Secretary Pi L Tochhong chuan a hawng a ni. Week hawnna thuchah a sawiah Chief Secretary chuan Mizo mipui tam zawk eizawnna tlangram lo neih avangte, fimkhur loh leh inhlei hrim hrim vangte in kum tin ramngaw namen lova hal chhiat a nih dan a tarlang a.

Mizoram sorkarin hmachhawp lian ber a neih NLUP chu retheite dawmchhuahna anih mai bakah ramngaw humhalh leh tuaitharna tura programme lian tak a ni, a ti a. NLUP hmang hian state chhung hmun za a sawmruk ramngawa siam tum anih thu te, za a sawm chu mipuite chak lak nan ruahman a nih dan te a sawi a. NLUP hmangin ramngaw humhalh leh leilung hausakna humhalh kalpui mekah hian a kaihhnawih Department zawng zawng te chu tan la lehzual turin a fuih a ni. Tlangram lo neih pawh nasa takin NLUP hmang hian tihtlem anih mek thu Chief Secretary chuan a sawilang bawk. Kangmei ven kawngah hian mitinin mawhphurhna an neih thu tarlangin Pi L Tochhong chuan kangmei chhuah thulah a thelh tura Mizo tlawmngaihna a pawimawh ber a ni, a ti a. Mipui inzirtirna pawh tun aia tam zawka kalpui a tul takzet a ni, a ti.

Vawiina kangmei ven chawlhkar hawnna inkhawmah hian PCCF leh SLFPC Member Secretary, Pu JL Singh chuan thuhma a sawi a. Kangmei ven chungchanga hmalak tawh dan leh hmachhawp mek te Addl. PCCF Pu Rosiama Vanchhawng chuan sawiin Mizoram University a Associate Professor Dr Lalnuntluanga chuan Mizoram chhunga ramngaw kanchhiat dan te, pawi a khawih thui dan leh a ven theihna hrang hrang bakah kangmei tichhuaktu te hrem theihna dan leh mipui mimir mawhphurhna hrang hrang powerpoint hmangin a hrilhfiah a ni.