Vawiin chawhma dar 11:00 khan Serchhip District Level Fire Prevention Committee bul tumin Serchhip D.C Conference Hall ah Serchhip District Kangmei Ven Hapta (Fire Prevention Week) February ni 18 - February ni 23, 2013 hawnna inkhawm hman a ni a, District Bawrhsap Pi Juhi Mukherjee, IAS chuan khuallian niin he hun hi a hmanpui a ni.

Khuallian District Bawrhsap chuan Kangmei ngaihthah avanga kumtina ramngaw tih chereu thin ani chu a vei thu a sawi a, kangmeiin mihringte a nghawng a neih nasat zia nasa lehzuala inzirtir a pawimawh thu sawiin hemi kawnga thawhhona tha a awmtheih nan tlawmngai pawl hrang hrangte leh mipuite nen a tanho a pawimawh zia a sawi bawk a ni.

Pu C.Lalbiaka, DFO Thenzawl chuan report pe in kangmei ven kawnga sawrkar hmalakna chi hrang hrang te tarlangin kumin chhunga hmalak an tum dan a sawi bawk a, DRDA Serchhip District nen tang hovin kangmei ven chungchang loneitute hnenah zirtirna pek a ni a, Social Audit neih mek anih rual hian BDO ten an kalna apiangah kangmei ven chungchang zirtirna hi an kalpui nghal a ni, hei bakah hian DRDA in MGNREGS atangin mei kawng sial na lamah hma a lakpui mek bawk. P&E Department pawhin kangmei ven kawngah tha thawh ve in tunah hian in tinah electric internal wirings an endik mek a, kangmei ven chungchanga inzirtirna pe turin kohhran tin hnenah ngenna siam niin, inkhawmna a chhiarchhuah turin thu ziak thawnchhuah a ni bawk. Village Council hrang hrang hnenah (Prevention & Control of Fire in the Village Ram) Rules, 2001 hnuaia an thuneihna leh an mawhphurhna te inhriattir a ni bawk. Hei bakah hian kangmei ven kawnga thawk tha khua thlan chhuah tur a ni a, tehfung hrang hrang hmangin lawmman pakhatna atanga pathumna thleng pek an ni ang.

Serchhip District Level Fire Prevention Committee hi January ni 25, 2000 khan din tan a ni a, District Bawrhsap Chairman niin DFO, Thenzawl chu Member Secretary a ni a, Head of Departments te leh NGO hruaitute member an ni.

Serchhip District hi kum 2011 khan Mizoram puma kangmei veng tha District thlanchhuah ah pathumna a ni a, 2012 khan pahnihna niin kumin hian pakhatna nih ngei tumin tan an la nasa hle a ni.

Vawiin Kangmei Ven Hapta Inkhawm hi Pu R.L.Chhuanawma, President, Sub-Headquarters YMA Serchhip in a kaihruai a, programme benglut tak tak ngaihthlak niin Pu Lalsangliana, MCS, Additional D.C in lawmthu sawiin hun a khar a ni.