No.3919/2021-2022
Dated Serchhip, the 7th February, 2022: Vawiin khan Serchhip District Level Committee on Fire Prevention huaihawtin ‘Kangmei Ven Hapta, 2022’ hawnna DC Conference Hall ah buatsaih a ni a. Pi Nazuk Kumar, IAS, Bawrhsap chu khuallian a ni.

Pi Nazuk Kumar chuan, ramngaw hi a chhunga cheng nunna neite nena inzawm tlat a ni a, mihringte pawh chung zinga mi chu kan ni. Mizote pawh hmanlai ata mamawh chi hrang hrang kan hmuhna leh ramhmul damdawi chena ramngaw hmang tangkai thin kan ni a. Kan lui leh tuihnate min siam saktu, kan sik leh sa vawngtu pawimawh a ni. A pawimawhna hi sawi sen loh a awm thei ang. Kan hriat angin ramngaw tichhetu hlauhawm tak chu ram kang hi a ni a, kangmei hi thil kan ngaihthah palh ho te atanga lo chhuak mai thei a nih bawk si avangin Serchhip district mipuite ramngaw humhalh kawngah te, ram kang venna kawngah leh fimkhurna kawngah te thapui thawh thar leh turin ka sawm che u a. Sawrkar department hrang hrangte, tlawmngaipawl, chanchinbumite leh khawtlang hruaitute pawh thawh hona tha tak nei zel chunga ramngaw humhalh leh kangmei venna lama tan la sauh sauh turin a fuih a ni. Pi Nazuk Kumar chuan tlawmngaipawlte inpekna avanga Mizoramin thil tha tam tak a neih tawh thu sawiin, khaw tina tlawmngaipawlte chu tun atanga inbuatsaiha, mahni zawnah theihtawp lo chhuah zel turin a ngen a ni.

He hun hi Pu RL Chhuanawma, Honorary Wildlife Warden chuan a kaihruai a. Pu Lalbiakchama Chawngthu, DFO, Thenzawl leh Member Secretary, District Fire Prevention Committee chuan Mizoramin ramngaw kan neih dan dinhmun tlangpui sawiin, nikum Forest Survey Report atanga tehin Mizoram chu za zela teha ramngaw nei zau ber state kan la ni a, chutihlaiin Ngaw chhah (very dense forest) erawh chu 0.74 per cent chauh kan nei a. Ngaw chhah hi kum tinin kan nei zau chho hret hret a ni. Nikum khan kum dang zawng zawng aiin Mizoramin ram kang kan tuar nasa a, ram kang 4486 zet Forest Department in an chhinchhiaha, an zinga 205 hi ramngaw kang niin a dang hi chu Lo hal, Huan hal leh Cha hal velte an ni.

Pu Kawlthuama, President, Sub- Headquarters YMA pawhin thusawiin, Pu Lalthantluanga, Range Officer, Thenzawl kaihhruaiin kal khawmten ‘Kangmei Ven Thutiam’ sawi rualna an nei a ni.

Kumin Kangmei Ven Hapta thupui atan hian “Kangmei ven hi mitin mawhphurhna a ni” tih chu thlan a ni. Kangmei Ven Hapta chhung hian inzirtirna chi hrang hrang kalpui turin District Level Committee chua ruahmanna a siam a ni.