No.3918/2021-2022
Aizawl the 7th, February 2022: Vawiin chawhma khan Convention Centre Hall, Lungleiah District Level Committee on Fire Prevention buatsaihin kangmei laka fimkhurna hapta, Fire Prevention Week ni 7th-14th, February,2022 thleng awh tur hawnna inkhawm neih a ni. Pu Kulothungan A, IAS, Deputy Commissioner leh District Level Committee on Fire Prevention,Lunglei chuan khuallian niin a hmanpui a ni.

Fire Prevention Week hawnna inkhawm hi Pi Lawmnapari ACF, DFO Office Lungleiin a kaihruaia Khuallian Pu Kulothungan A, chuan thu sawiin Fire Prevention Week chu kangmei chhuak lo tura fimkhur tura bultanna chauh a ni, tiin hemi piahlam ah hian nasa zawka inzirtira kangmei chhuaklo tura theihtawp chhuah zui a pawimawh a ni, a ti. Mizoram chu India hmarchhak ah ramngaw awmthatna hmun a nih thu leh Mizoramah pawh Lunglei District chu Mamit District tihloh ah chuan ramngaw nei tha District kan ni tiin, heng ramngaw kan neihte hi kangmei lakah kan venhim that a pawimawh a, kan venhim that loh chuan Nungcha hrang hrangte tan awmna tlakloh ah kan siam theia nungchate an rem chuan mihring tan pawh a khawsak theiloh a ni, a ti. Mizorama kangmei chhuah chhan tam ber chu kumtina lo neih sawn thin vang a nih thu leh lo hal avanga ramkang a chhuak nasa lutuk thin thunun turin mitin in mawhphurhna kan neia, a bik takin hemi kawngah hian V.C te an pawimawh hle a, lo hal avanga ramkang a awm lohna turin mahni khua theuhah V.C ten theihtawp chhuah a, mipuite nasa zawka zirtir a tul thu sawiin ram ti kang lo turin Forest Department chauh an tawklo a, mi zawng zawngin mawhphurhna kan nei tih i hre thar ang u, a ti.

Pi Lalrammawii Sailo, Divisional Forest Officer Lunglei, Member Secretary District Level Fire Prevention ni bawkin report a a tarlan danin Fire Prevention Week hi Mizoramah kum 2000 atangin hman tan a ni a, kangmei chhuak tur venhim kawnga District titha tehna ah Lunglei District chuan kum 2010 ah lawmman pahnihna, 2011 ah Pakhatna,2012 ah Pathumna leh 2017 ah Pahnihna lawmman a dawng tawh a ti .Lunglei District bikah nikuma kangmei veng tha lawmman dawngtute chu Pakhatna Zobawk, Pahnihna Changpui, Pathumna Lungdai South an ni tih a tarlang bawk a. Kum 2019 khan Lunglei District chhung hmun 187 ah ramkang awmin, 2020 ah hmun 237 ah, 2021 ah hmun 407 ah ramkang awmin ramkang zawng zawng zau zawng hi hectre 4365 a nih thu a sawi a ni.

Vawiina Fire Prevention Week hawnna inkhawmah hian Dr.Lalramzauva, Director Christian Hospital Serkawnin 'Ram kangin hriselna a nghawng dan' tih thupui hmangin paper a present bakah 'Ramkang ven beihpui thlak' tih thupui hmangin Pu R.Lalrochama, Associate Professor Lunglei Gov't College in Paper a present bawk a ni.

Vawiin Fire Prevention Week hawnna inkhawmah hian Pu Zothanzuala Hnamte, Secretary YMA Sub Hqrs Lunglei kaihhruaina in he huna kalkhawmte hian thing leh mau,nungcha te duat taka enkawl tur leh ram tikang lo tura thu tiamna neih a ni.