Vawiin chawhma dar 11:00 khan Champhai Venglai Community Hall-ah Pu Zoengsanga, Addl.D.C & Chairman, Champhai District Fire Prevention Committee chuan Kangmei Ven Hapta a hawng.
Khuallian Pu Zoengsanga chuan thu sawiin furpui lo thlen hma chuan khua a thal in a ro dawn a, ram kang tur ven a pawimawh thu sawiin tun hun hi chumi atana hapta bik hawnna a ni a, Kangmei chu karkhat chauh nilo, ven a ngaih chhung chu ven mai tur a ni tiin VC leh Central YMA ten kangmei venna kawngah hma an la a, hei chauh hi a tawk lo, pulpit atanga auchhuahpui a ngai tawh a. Pathian thilsiam nungcha leh ramngaw te mihringin kan ti chereu nasa lutuk a, keimahni chenna kan tichhe chawp a ni a ti . Khawtlang leh tlawmngai pawlin veng mahse misual leh mi awmherh ten an lo tikang leh thin a, zin veivak leh motor atanga meibung paih ten ram an tikang thei bawk a. Chuvangchuan keini ram neitu te hian Zoram dung leh vangah kangmei venna kawngah tlangau zelin theihtawp kan chhuah a ngai a ni, kan thian, kan bul hnai amite hrilh zelin kangmei hi kan khuahkhirh theih a beiseiawm ani khuallian chuan tiin kan boruak hip luh te ti kang mai mai lo tura tan la turin kalkhawmte a sawm a ni.
He programme Pu Vanlalchuailova, DFO & Member Secretary, Champhai District Fire Prevention Committee kaihhruai ah hian Pu C.Lalhnunpuia, District Honorary Wildlife Warden, Champhai pawhin thusawiin Champhai ah ramngaw kan nei tha tawh lova, a chereu zo tawh. Khua a vawh vanga tunhma a Champhai a thei kung nung thei lo te chu tunah hian lian pui pui an ni thei tih hmuh hian ram ngaw a chereu in khua a lum tawh hle tih a lang a, chuvang chuan nasa zawka ram ngaw humhalh kawngah tan lak a ngaih thu leh ram ngaw kan la chhan theih thu a sawi a. Pathian in nungcha leh ram ngaw te chungah mawhphurhna min pe a, venhim leh enkawl chu kan tihtur a ni chuvang chuan ram kang ven himna tur atan a tharin ke I pen leh ang u tiin kalkhawmte a sawm bawk a ni.
Kangmei Ven Hapta hawnna inkhawm hi a hlawhtling hle a, sawrkar department hrang hrang leh Tlawmngai pawl ten an ngaipawimawh hle a, zawhna leh chhanna hun hman anih hnuah Pu GLK Thanga, RO Champhai in lawmthu sawiin he hun hi khar a ni.
