Vawiin khan kangmei ven Hapta ni 3 - 10 February, 2012 chhunga hman tur chu Chhim Veng YMA Hall, Mamit-ah Pu Rodney L. Ralte, IAS District Bawrhsap Chairman, District Fire Prevention Committee chuan a hawng.

Hawnna inkhawm Pu Zatluanga Sailo, President, Sub-Hqrs. YMA Mamit kaihhruaiah thusawiin District Bawrhsap chuan kumtina ram kan la tih kan thinna chhan hi ram kang pawizia leh thing leh mau hlunta mipuiten kan la hre tawk lo ni a a hriat thu a sawi a, hemi kawngah hian Zoram mipuite kan thanharh a hun tawh hle a ni a ti. Khuallian chuan ram kang venna leh ram humhalhna dan fel tak sawrkarin a neih thu tarlangin ram ti chereu leh tikangtute chu dan anga hremna an chungah lek theih a nih thu te, Mamit District ah phei chuan hei hi lekkawh a nih tur thu a sawi a, chutianga dan lekkawh ngai lo tur khawpa hma la tur leh fimkhur turin khawtina V/C te leh tlawmngai pawlte bakah District chhunga mipuite a sawm a ni.

Khuallian District Bawrhsap Pu Rodney L. Ralte chuan ram kangin chhiatna a thlen dan hrang hrang te tarlangin sawrkarin NLUP a kalpui mek hi intodelhna tha tak a nih piah lamah kangmei laka kan himna tur pawimawh tak a ni a ti bawk.

Pu Lallianzuala, DFO, Member Secretary, District Fire Prevention Committee chuan report pe in nikum 2011 khan Mamit District ah lo hal vangin hmun 49 ah kangmei a chhuak a, ram tin 130 hmun lai a zau ram tih kan a ni a ti a. Nikum 2011 vek khan fimkhur loh avangin hmun 11 ah ram a kang a, tin 2200 hmun zet tihkan a nih thu report ah hian tarlan a ni. Pu Lianzuala chuan kumina ram tikang lo tura District Level Fire Prevention Committee in hmalak a tum dan te sawiin kang venna kawnga hnathawk tha khua pathum thlan an nih dawn thu leh ram tikang nasa khua panga a thlan chhuaha dan dinglai hmanga hrem an nih dawn thu a tarlan bawk.

Ram kang venna kawnga hmalakna chikhat, Middle School leh High School naupangte tana buatsaih Painting Competition leh Slogan Writing Competition a lawmawm te he hunah hian sem a ni a, Slogan writing competition ah 1st Z. Lalchunglura, Zion Veng Mamit Rs. 1,000/-, 2nd Lalnunmawia High School Veng, Mamit Rs. 750/- leh Angela Lalrinchhani Zion Veng Rs. 500/- hlan an ni a. Painting Competition Middle School Section ah 1st Lalruattluanga Sailo Cl-VIII St. Francis of Assissi School Rs. 2,000/-, 2nd V.L. Hruaizela, Cl-VIII St. Francis of Assissi School Rs. 1,500/-, 3rd Laldingngheta Cl-VIII Govt. M/S III Rs. 1,000/- niin High School Section ah 1st Aldrin Lalchhanchhuaha, Cl-IX New Mamit Sec. School Rs 2,000/- 2nd C. Zomuansanga Cl-IX St. Francis of Assissi School Rs. 1,500/- leh 3rd V.L. Hmangaiha Cl-X Govt. H/S School Mamit Rs, 1,000/- te hnenah hlan an ni a.

Lawmman hi khuallian District Bawrhsap in a sem a ni.

He hunah hian Head of Offices, NGO hruaitute leh School naupang thahnem tak an tel a ni.