Tukin zing dar 10:00 khan Pu H Rohluna, Food, Civil Supplies & Consumer Affairs Minister leh Sorkar Laipuia Ministry of Consumer Affairs, Food & Public Distribution hnuaia Secretary, Food & Public Distribution Department Dr. B.C. Gupta IAS te chuan Pu H. Rohluna Pisa-ah meeting an nei.

Meeting-ah hian Mizoram a buhfai chawkluh dan kawng dang awm thei te an sawiho a. Assam leh Meghalaya tan Kolkata atanga Bangladesh kaltlanga Sorkar laipuiin lawng lian chi hmanga buhfai phurh a ruahman mek chu Mizoram pawhin a chhawr tangkai theih dan chungchang an sawiho a. Supply Minister in APL buhfai allocation tihpun leh chini quota tihpun chungchang a sawi chu Ministry chuan a ngaituah tur thu Secretary hian a sawi a, OMSS hnuaia buhfai tonne 6000 pek a tiam bawk a ni.

Sairang leh Bairabi a FCI Kudam sakna tur ruahmanna chu chak zawka hmalak dan meeting ah hian rel a ni a. Supply Department kaltlanga Mizoram hmun 17 a Kudam sak tur chungchang te, Kudam hlui cheithat kawnga harsatna an tawh chungchang te leh Union Secretary in Cooperative Society leh Self Help Group te ration sem atana hman tangkai a rawt chungchang te an sawiho a. Supreme Court in Ram chhunga ration card zawng zawng computerize tur thupek a chhuah tihhlawhtin chungchang te pawh meeting ah hian an sawiho bawk a ni.

Union Secretary hian Mizoram a aurinna hmanga ration sem dan puan chu fakawm a tih thu Minister hi a hrilh bakah Supply Department in Engineering Wing an neih a tul thu pawh a sawi bawk a ni.

He meeting ah hian Pi M.Zohmingthangi, Secretary, Food, Civil Supplies & Consumer Affairs Department, Supply Department officer thenkhat, Pu Pinuel Basumatary Executive Director Food Corporation of India, Area Manager FCI leh NIC aiawh te an tel a ni.