3681/2022-2023

Champhai, the 25th February, 2023 : Champhai District Level Fire Prevention Committee leh Chawnchhim Rifle Club (CRC) te tangkawp buatsaihin kangmei ven leh nungcha humhalh kawnga inzirtirna pualin Champhai District Shooting Competition 2023 chu vawiin chawhma khan Zote Playground-ah, 'Thapui thawhin kangmei i veng ang u' tih thupui hmanga huaihawt a ni.

A khuhhawnna hun hmanpuitu Champhai  District Bawrhsap Pu James Lalrinchhana, Chairman, District Level Fire Prevention Committee chuan District Level Committee thurel bawhzuina ataka tih hlawhtlin a ni chu lawmawm a tih thu a sawi a. Kan ram sik leh sa nasa taka a danglam thu leh nungcha, thing leh mau an chereu nasat thu sawiin, fimkhur loh vangte, tih luih leh tih palh avanga ram kang chhuak thin chuan ramngaw bakah nungchate chena a suat nasat avangin kangmei ti chhuak lo tura fimkhur a ngai hle a ni, a ti a. Kalkhawmte chu kan ram neih zimte leh mawi tak ven him kawngah leh a chhunga cheng nungchate duat taka enkawl kawngah hmasawn tuma ngaihtuahna thar seng turin a chah a. Thangtharte tana ram nuam leh mawi tak, chenna tlak hnutchhiah tum tur leh, kum dang zawng aia nasa a tan la tura chahin, Silai kah thiam kalkhawmte chu kangmei chhuak thin ven kawnga theihtawp chhuahpuiah a sawm bawk.

Champhai District Magistrate Pu James Lalrinchhana chuan silai kawlte chu license an neih chhan leh Sawrkarin an chunga rinna a nghah chhan hre renga, mawhphurhna an neihte rinawm taka zawma hlen ngei tum turin a fuih a. Dik lo taka hman leh midangte hawh tir te, nungcha suat leh tualthah nana hman a nih loh nana fimkhur turin a chah bawk a. Silai vawnthat leh lek chhuah kawngah Sawkar dan siamte zawm tur leh, rilru fim tak pu theuh turin a chah bawk a. Silai kah themthiamna chu nungcha suat nan ni lo, mahni leh midangte ven him nante leh shooting sports atana hman tangkai tum zawk turin a chah a. Buatsaih a nih chhan anga hlawhtling taka Champhai District Shooting Competition neih a nih theih nana duhsakna hlanin a hawng a ni.

Pu HS Lalthachianga, Vice President, Chawnchhim Rifle Club hnen atangin inkaihhruaina hrang hrangte a sawifiah hnuah intihsiakna hi tan nghal a ni.

Kharna hun tlai dar 4:30 a neih hmanpuitu Khawzawl District Bawrhsap Pu C.C. Lalchhuangkima, Chairman, District Level Fire Prevention Committee, Khawzawl District chuan District Level Committee leh Forest Department ten Silai neite tan nungcha humhalh leh kangmei ven kawnga inzirtirna hun tha tak an buatsaih chu lawmawm a tih thu a sawi a. Khawvel puma Silai inkahsiak inelna huangah India-in result tha tak a neih thin thu pawh sawiin, Mizote zingah pawh theihna nei an awm nual thu leh khawvel pum intihsiaknaa lang thei tura tanlak zel a pawimawh thu a sawi a. Kalkhawmte chu a nihna ang tur taka Silai hmang tur leh shooting sports a hmasawn tura tan la zel turin a fuih a ni.

DFO Champhai Pu Lalduhthlana chuan lawmthu sawiin he hun hi a khar a ni.

Intihsiakna hi Category 3 ah neih niin, Category hrang hranga tel zat belhkhawm hi mi 174 an ni a; result kimchang hi hetiang hi a ni:

A) 30 Metres .177 Airgun Extreme Benchrest (EBR) Category:
1) C.Ramdingsanga, PTT Zotlang (Rs 5,000/- & Citation)
2) Tommy Lalremruata Hnamte, Khawzawl (Rs 3,000 & Citation)
3) PC Lalbiakmawia, New Champhai, CRC (Rs 2,000/- & Citation)

B) 70 Yards .22 Airgun Extreme Benchrest (EBR) Category:
1) Johny Lalhmangaiha, Venglai (Rs 5,000/- & Citation)
2) Lalliankima, PTT Zotlang (Rs 3,000/- & Citation)
3) PC Lalbiakmawia, New Champhai, CRC (Rs 2,000/- & Citation)

C) 20 Metres 12 Bore Ulhbun mupui inkahsiak Category:
1) H.Raldoliana, Vengthlang (Rs 12,000/- & Citation)
2) Jacob MS Dawngzela, PTT Zotlang (Rs 8,000/- & Citation)
3) Lalthlengliana, Melbuk (Rs 5,000 & Citation)

Lawmmante hi Dr. Lallawmkima DIPRO Champhai, Pu Lalhlupuia, Honorary Wildlife Warden, Champhai District leh Pu RC Rodawla, VCP Zote ten an hlan a ni.