3682/2022-2023

Lunglei the 25^th February, 2023 – Health & Family Welfare Minister Dr R. Lalthangliana chuan vawiin khan Civil Hospital Lunglei, Chanmari ah Integrated Laboratory leh naupang damlo na zual enkawlna tur khum 12 awmna Pediatric ICU a hawng.    

Hawnna inkhawm Doctor’s Seminar Hall, Civil Hospital Lungleia neihah Minister Dr R. Lalthangliana chuan mipuite damna leh hriselna atana ruhrel pawimawh tak pahnih Integrated Laboratory leh Pediatric ICU-te tluang taka zawhfel an ni chu lawmawm tiin heng ruhrel ruahman te ti hlawhtling tura rim taka thawktute zawng zawng chungah lawmthu a sawi a. Health kaihhnawihah Mizoram chu India rama hmasawn chak berte zing ami ni chho mekin India ram pumah kum hnih a zawnin Infant Mortality Rate (IMR) hniam berna State kan ni a, NITI Aayog ina ram pum huapa hriselna dinhmun a zirchianna NITI Aayog Health Index-ah Mizoram chu Small States zingah pakhatna dinhmun kan luah mek a ni, a ti.   

H&FW hmalakna ti chak turin infrastructure development leh thawktu lak belh kawngah nasa taka hmalak chhoh mek zel anih thu H&FW Minister chuan a sawi a. Mizoram khaw 235 Health Sub Centre awmlohnaah SEDP Health Clinic din turin ruahmanna kalpui mek niin pawisa pawh dah fel tawh a ni, a ti a. Civil Hospital Lunglei ti changtlung turin SEDP atangin cheng nuai 190 leh NEC atangin cheng nuai 392 ruahman anih thu a sawi a. Mizorama District thar pathum – Hnahthial, Saitual leh Khawzawl CMO Office te pawh hawn thein peih fel anih tawh thu a sawi bawk.

Cheng nuai 70,000 senga Japan International Cooperation Agency te nena tangkawpa ruahman tur Cancer Superspeciality Hospital, Zemabawk a din tum mek chungchangah pawh hmasawnna duhawm tak awmin February ni 27, 2023 (Thawhtanni) hian Sawrkar Lapui leh JICA ten Final MOU an sign tur thu a puang a ni.

Covid-19 hrileng do kawnga a hmatawnga awm nunna chan chhungte hnenah chhawmdawlna pek chhuah anih thu pawh sawiin H&FW Minister chuan Mizoram Ex-Gratia Lump Sum Compensation Scheme kaltlangin VLTF/LLTF member nunna chan mi 9 chhungte hnenah cheng nuai 20 theuh pek tawh niin mi pakhat dang chhungte hnenah la pekchhuah tur anih thu a sawi a. Covid-19 do kawnga Health Worker te tana sawrkar laipui Insurance scheme Pradhan Mantri Garib Kalyan Package kaltlangin Mizorama health worker nunna chan mi pahnih – Lalpianvula leh Rohmingliana te chhungkua hnenah cheng nuai 50 pek chhuah tawh anih thu a sawi bawk.

Hawnna inkhawm hi H&FW Principal Director Dr T. Lalhmangaihi’n a kaihruai a, Rev R. Lalbiakliana, General Secretary, BCM in hunserh a hmang a. Dr. ZR Thiamsanga MLA, Vice Chairman, Health And Family Welfare Board, Lunglei HPC Vice Chairman Pu Lawmawma Tochhawng leh Bamboo Development Board Vice Chairman Dr K. Pachhunga te pawhin thu an sawi a, Dr PC Lalramliana, Director, H&ME in lawmthu sawina hun a hmang a ni.

Integrated Laboratory ruahman dan Technical Report chu PWD Building EE Er Malsawmdawngliani in a pe a. He Integrated Laboratory hi a Funding Source chu State Fund niin a Implementing Department hi PWD Mizoram a ni a, contractor hi Pu KT Nghawra, Zohnuai Lunglei a ni. Sanctioned amount hi cheng nuai 192.98 niin work order amount hi cheng nuai 145.56 a ni a. Hna hi 28.10.2021 ah thawh tan niin 28.10.2022 ah thawh zawh a ni. A project hian building sak bakah tui supply na siam te, pipe line siam that, LT Line shifting, site development leh underground tanky sak te a huam tel a. He Integrated Laboratory hawn takah hian RTPCR Room, Extraction room pahnih, Biomedical waste room, doctor office, RO Plant, RNA Extraction Room, Cool Store, night duty room pahnih, Staff office, Sample reception & decontamination room, doffing, break room, utility service room leh inthiarna pathum a awm a ni. He building hi la sak chhoh zel tura ruahman niin 1^st floor ah Biochemistry Lab, 2^nd floor ah Pathology lab leh 3^rd floor ah Microbiology lab te ruahman chhoh zel tum a ni.

Dr Eric Zomawia, Mission Director, NHM chuan Pediatric ICU chungchang report a pe a. Naupang damlo na zual enkawlna Pediatric ICU hi Sawrkar Laipui ‘India COVID-19 Emergency Response & Health System Preparedness Package: Phase-II (ECRP-II package)’ Scheme kaltlanga ruahman niin Intensive Care Unit (ICU) kum pali (4) leh High Dependency Unit (HDU) khum pariat (8) a awm a. Portable EEG, Portable X-Ray, 12 Lead Portable ECG, Emergency Cart, Blood Gas Machine, Invasive Ventilator, Portable Suction leh khawl dang engemawzat dah a ni a. He ICU a duty tur hian MBBS Doctor pakhat, Nurse paruk leh attendant pathum ruat fel tawh an ni.

Hawnna inkhawm-ah hian Lunglei District-a sawrkar hotute leh official-te bakah MJA Lunglei, YMA hruaitute, leh sawm bik dangte an tel a ni.