Vawiin, April Ni 26, 2013 zing dar 11.30 khan Youth Festival, Aizawl-a nghah chu a tiak ta. Zing dar 10:00-11:00 inkhawmah Pu R. Vanhnuaithanga, Deputy Director, Information & Public Relations chuan Career Guide chungchang sawiin, ‘Mizo Thalaite aia thluak tha an awm chuang lova, tumruhna neia taima taka kan inbuatsaih phawt chuan Mizote hian India rama hna sang IAS leh Civil Services dangah te hian kan tling thei ve ngei a ni,’ a ti. Tunlaia Mizo thalaite chu naupan lai atangin English Medium-a lehkha zirin, saptawng pawh in thiam a, in tum a ruh phawt chuan India rama hna tinrengah hian tlin theih vek a ni. Mahse Mizote kan inthlahdah ta deuh va, Mizoram pawna chhuah kan hreh em em. A bik takin lehkhathiam Graduate chinte hian Mizoram chhung chauhva hnathawh kan tum chuan hna tha in min daih lo. Kan vela Mizo hnathlak, keini aia hnufuala kan ngaihte hian UPSC hnuaia hna hrang hrangah te, Staff Selection hnuaia Group ‘B’ leh ‘C’ hna hrang hrangah te tlin tumin inbuatsaih ila, kan tlin thei ve ngei ang. Combined Graduate Level Exam kumtin buatsaihah Mizo Graduate leh Post Graduate te pawhin luh tum ila, Delhi-ah khuan hna pawimawh thawka awm kum 10 chhunga 1000 tal luh I tum ve ang u,’ tiin Zirlaite a sawm a ni.

He Youth Festival-ah hian High School- College thlengin zirlai 400 dawn lai an kalkhawm a ni. “Sorkar Quota ringawta Engineer leh Doctor lam zir tum lovin, Armed Forces Medical College, Pune-ah 10+2 PCB marks 60% hmu pha tan kumtin zirna hawn a ni a, PCB-a marks 50% hmu chin tan BSc Nursing zir theih a ni bawk;10+2 PCM- marks 70% hmu chin tan Army/Navy chawmin Engineering chi hrang hrang a zir theih bawk tih hria ang u,” tiin a sawi bawk.

Mizo thalaite hi engkim kan thiam thei a, kan rilru a chaka, kan tum phawt chuan tih theih loh a awm bik lo. Pathian tih chunga kan hna hmuh apiang thawkin, chhungkua, khawtlang leh ram tana mi chhuanawm nih hi Mizo thalaiten tum turin a fuih bawk.

Chhun dar 12:00-ah Youth Festival-a telte chuan Beraw tlanga Art & Culture Auditorium chu an chhuahsan ta a ni. Pu Lalngilneia Colney-in he Meeting hi a kaihruai a ni.