Vawiin khan Pi Esther Lalruatkimi, Secretary, Health & Family Welfare Department kaihhruaina in Press Club ah State Level Task Force Meeting an nei. He meeting hi Dr.Rana J.Singh, Technical Adviser, The Union South East Asia, New Delhi chuan a hman pui a ni. He hunah hian engtinnge Mizorama chak lehzuala vaihlo khuahkhirhna dan (COTPA) kalpui zel a nih ang tih sawiho a ni a, meeting hmasa a thu rel tawh bawhzui nana hmalak tawhna hrang hrangte thlir letna hun neih a ni bawk.

He hunah hian vaihlo khuahkhirhna dan hnuaia section hrang hranga hmalakna sawihona neih a ni a, vaihlo khuahkhirhna dan hnuai a Section 4 (puipunna hmun reng renga meizuk khapna dan) te, Section 5 (Vaihlo fakmawina lam reng reng khapna dan) te, section 6-a (vaihlo zuar reng rengin an zawm tur kum tling lo hnena vaihlo hralh khapna dan leh an thil tar ngei ngei tur) te, Section 6-a (vaihlo leh a kaihhnawih reng reng zirna in atanga Feet 300 (Yard 100) biala zawrh khapna dan leh zirna in reng reng ah zirna in a langsar lai ber a vaihlo zawrh phal a nilo tih tarlanna thuziak) te leh section-7 (vaihlo leh a kaihhnawih bawm reng renga Health Warning tar) chungchangte sawihona hun neih a ni. He hunah hian District tina Task Force ten an tih tur an thawk tha em tih te, Public Place a in-charge/head tin ten an thuneihna huam chhungah meizuk khapna dan an kengkawh tha tawk tawh em tih an thlir ho bawk a ni. Report atanga a lan danin puipunna hmuna meizu hi an la tam hle mai a, squad drive neih pawhin man tur an la tam thei hle tih hriat a ni bawk. Vaihlo khuahkhirhna dan hnuaia section hrang hrangah te hian chak lehzuala hma lak a ngai hle tih report a ni bawk.