Karnataka Chief Minister Pu Jagadish Shettar chuan Chief Minister Pu Lal Thanhawla chu lehkha rawn thawnin, tunhnaia Bangalore a hmarchhak mi ten vauna an tawh avanga Bangalore tlanchhiatsanna runpui a thlen chungchangah Karnataka sorkar hmalak dan tlangpuite a rawn hrilh.

Pu Shettar chuan August ni 15 khan Karnataka sorkar chuan Muslim te hunpui, Ramzan zawh veleha hmarchhak mi te beih an nih tur thu SMS leh MMS hmanga thu thehdarh a ni tih a hriat thu a tarlang a. He thu hi sorkarin a hriat veleh chet la nghalin, hmarchhak mi thlabar tak chunga, mahni state theuh pan tura rel stationa pungkhawmte chu hnem tur leh, venhimna pek an nih tur thu hrilh tura Deputy Chief Minister, Home Minister ni bawk leh Police hotu lian te tirh nghal an ni a ti a. Amah (Chief Minister) Chairman-na hnuaiah state administration leh police department te nen meeting neih nghal bawk anih thu Chief Minister hi a rawn hrilh bawk a. Meeting rorel angin venhimna tha tawk hmarchhak mite hnenah pek te, zualkona tur telephone number thehdarh te, hmarchhak mite puala pawl hrang hrang hotute kawmna te neih a ni, Chief Minister chuan a ti a. Hengte bakah hian venhim tul bika ngaiah te Rapid Action Force leh CRPF dah te, hmarchhak pan tur, rel tina police dah te, mipui leh sakhaw hruaitute chu boruak tha vawnghim tura ngenna te siam a ni a ti a. Assam Transport leh Agriculture Minister te nen press conference neih anih thute a tarlang a. Hmarchhak mi te thehluh thubuai 13 ziahluh tawh anih thu leh mi 6 man an nih tawh thu lehkha ah hian a ziaklang bawk a ni.

Karnataka Chief Minister chuan hmarchhak unaute leh kan thenawm Bhutan leh Nepal mite himna hi an ngaipawimawh a ni tiin, invauna thawndarhtu te hi ngawrh taka zawn reng an ni a ti a, Karnataka sorkar chuan muanna vawn nun leh, dan leh thupek kenkawh hi chak takin a kalpui reng a ni a ti.