UD&PA Minister Pu Zodintluanga chuan vawiin chawhnu dar 1:30 khan Synod Conference Centre-ah UD&PA Department hnuaia SJSRY-in Urban BPL Women Self Help Group te tana Training a buatsaihnaa tel te hnenah tanpuina sum a sem.
Khuallian Pu Zodintluanga chuan thusawiin kuthnathawktu leh mi rethei ten lei rem an lo raha eizawnna ngelnghet an neih chu Sorkar ngaihpawimawh ber a nih thu a tarlang a, Sorkar Laipuiin Notified Town-a a puan khaw hrang hrangah UD&PA Department-in kawng hrang hranga hma a lak mek thu te a sawi lang bawk. Mi rethei, mahni puala in leh lo nei lo te chenna atana Sorkarin hmun hrang hrangah in a sak mek thu te sawiin vawiina tanpuina dawngtu te chu Department lamin ngun taka vil zuia Training an hlawkpui chhoh zel dante chhui zui thin turin a chah bawk. Dinhmun harsa zawk ten tanpuina sum tlem te te an dawn lawm taka an dawn thin laia, hlawh tam tak la sorkar hnathawk ten lunglawi loh vanga nawrh an huaihawt thin chu ngaihmawhawm a tih thu a sawi a. Sorkar hna chu mipuite awlsam zawk nana awm, mipuite rawngbawl hna a nih hre reng fo turin Minister chuan sorkar hnathawk te a chah bawk. Loan lak chungchangah pawh Mizo tam tak rilru ah duh duha hman ral mai theih ni-a kan ngaih tlat thin avangin mumal taka loan nihphung leh awmzia te inhrilhfiah uar deuh deuh tul a tih thu a tarlang bawk.
Khualzahawm Pu R.L.Rinawma, UD&PA Principal Secretary pawhin thu tawi sawiin UD&PA Department hmalakna huam zau zia leh Officer leh Staff te thawhrim thin zia te a sawifiah a, ram pum huap pawha thawk tha pawl an tlin thu a puang bawk. Mizo hmeichhia te chu Mizoram sum leh pai, ei leh bar dinhmun chawikangtu an ni tiin an thawhrimna azarah hlawhtlinna hmuh zel a beisei thu a sawi bawk.
Vawiin chawhma lam khan Urban BPL Women Self Help Group te Training neihpui an ni a, heng BPL Training hmangtu SHG 18 te hnenah Minister chuan tanpuina sum Rs 25,000 /- theuhvin a hlan a, Principal Secretary chuan Trade 6 - Motor Driving, Broom Making, Hair Cutting, Flower Making, Computer Hardware leh Mobile Handset Repairing hmanga Training Centre siamtu te hnenah Certificate a hlan bawk.Vawiin Urban BPL Women Self Help Group te hnena tanpuina sem leh BPL Trainees te hnena Certificate hlan inkhawm hi UD&PA Director Pu K.Lalthawmmawia’n a kaihruai a ni.
