Olympics 2016-ah India ram aiawha Mizoram infiammite an tel ve ngei theihna tur in Sports Minister Pu Zodintluanga chuan tun hnai khan ‘Olympics Vision 2016’ tih thupuia hmanga beihpui thlak a nih tur thu a puang a. He beiseina hi tihhlawhtlin ngei a nih theihna turin vawiin chawhnu dar 3.00 khan Archery Association of Mizoram-in thalkah zirna hmun atana an hman mek New Secretariat Complex-ah Home Minister Pu R. Lalzirliana chuan a bul tanna hun a hmanpui a ni. Home Minister Pu R. Lalzirliana chuan, “Mizo thalaite hian khawvel zau zawk thlir chunga infiamnaah hian thapui kan thawh chuan hlawhtlinna kan sual chhuak ngei ang tih hi beiseina mitin a hmuh theih a ni. Chuvang chuan, infiamna peng hrang hranga mawhphurtuten coach tha takte enkawlna hnuaia talent nei thate an kaihruai hi an fakawm a, Mizoram mipuiten kan infiammite chungah beiseina sang tak kan nei a ni” a ti.
Vawiina Olympics Vision -2016 hawnnaah hian Supply Minister Pu H. Rohluna te, Health Minister Pu Lalrinliana Sailo te, Sports Minister Pu Zodintluanga te, Social Welfare Minister Pu P.C. Lalthanliana te, Parliamentary Secretary Pu Lalrinmawia Ralte te, Pu S. Laldingliana te, Govt. Deputy Chief Whip Pu R.L. Pianmawia leh Pu John Siamkunga MLA te bakah Mizoram State Sports Council Secretary Pu C. Laltlanthanga te, official dangte leh thalkah zirlaite an tel a ni. Tunah hian Archery Association of Mizoram hnuaiah hian naupang 20 - mipa 15 leh hmeichhia 5 ten ngawrh takin thalkah an zir mek a, kum 1996 Olympics-a thalkah a India ram aiawh lo ni tawh, Sports Department hnuaia Coach hna chelh mek Lalremsanga leh zirtirtu dangten zirlaite hi an kaihruai a ni. Thalkah zirnaah hian rilru thunun leh sawrbingte a tangkai avangin zirlaite hian yoga coach hnuaiah hun an hmang thin dawn bawk a ni. Archery hi tih tak taka Mizoram-in a buaipuina a la reilo hle nain, tun dinhmunah hian India ram state zingah Sub-Junior-ah 4-na leh Junior-ah 8-na an hauh pha tawh a ni.
Vawiina Olympics Vision 2016 hawnnaah hian MLA te chu thalkah-ah an inel fiam a, Home Minister Pu R. Lalzirliana chu pakhatna a ni. Home Minister hian Archery Association of Mizoram hi Rs 5,000 (cheng sangnga) in a tanpui a ni.
