Vawiin khan Lawngtlai District Disaster Management Committee chuan Kawlchaw ‘W’ Village Level Disaster Management Committee hnenah hun eng emaw chhung atana kawl turin chhanchhuahna hmanrua an hlan chhawng.

Hmanraw inhlanchhawnna inkhawm tawi, DC Conference hall-a buatsaihah Chairman, Lawngtlai District Disaster Management Committee Pu J. Hmingthanmawia, Lawngtlai District Bawrhsap ni bawk chuan thu sawiin Chhimtuipui-ah tuitla leh chhiatna dang a thleng fo thin a, chhanchhuahna hna thawk turin a hnaih ber khua te an thawkrimin an hah thin hle, hmanraw tha leh changtlung zawk an neih loh avangin harsatna tam tak an tawk fova. Hetiang harsatna a lo thlen changa rang zawk leh awlsam zawk a chhanchhuahna hna thawh theih a nih beiseiin Kawlchaw ‘W’ ah Village Level Disaster Management Committee dinthar a ni a, an ni hnenah hian hmanrua eng emawzat hlan a ni ta a ni a ti.

Kawlchaw ‘W’ VCP, Village Level Disaster Management Committee Chairman ni bawk Pu Lalhmunmawia pawhin thu sawiin tui tla an awm in rang taka chhanchhuah hna thawh a ngai thin a, amaherawh chu hmanruate kan neih that loh avangin mimal lawngte hawh chawpin hna kan thawk thin; eng emaw chang phei chuan kan lawng hawh te kan tihchhiat palh thin avangin sum tam tak seng in kan siam sak leh thin. Hetiang a Disaster Management Committee in hmanrua min kawltir theih dawn takah chuan nasa takin kan hlawkpui thei dawn a kan lawm takzet a ni, tiin lawmthu a sawi.

Vawiin a hmanrua an in hlanchhawn tak te hi Rubber Boat engine hmang 1, Life Jacket 8, Search light 1, Torch light 1, Silpaulin lian 2 leh Politarpaulin 2 te an ni a, Kawlchaw ‘W’ khawtlang atangin a dawng turin Village Level Disaster Management Committee member 6 an rawn kal a ni.