Soil & Water Conservation Department hnuaia Kawlkulha hectare 1,413-a zau Compact Area Development, IWMP-1 hmalakna chuan zirchian a hlawh hle a. November ni 26, 2014 khan Horticulture Department chuan Farmer’s Exposure Tour buatsaihin, Lungphunlian, Tualcheng, Murlen leh Vapar-a loneitu mi 40-vel chuan he hmuna hnathawh hrang hrangte tlawhin an kal a. Anni bakah hian Saitual IWMP, Lunglei IWMP, Serchhip DRDA leh MCS probationer rual-ten an lo tlawh tawh a ni.

He Project enkawltu (PIA) Pu Lalramliana, District Officer, Soil & Water Conservation, Champhai District, Khawzawl chuan Kawlkulha Compact Area Development kalpui hmasak ber a nih thu sawiin, he project hi a hlawhtling tan hle a, kuthnathawktu pawhin an hlawkpui hle tawh a ni, a ti a. A hlawhtlinna chhan hi thawhhona that vang anih thu a sawi a ni.

Vawiin thleng hian buh (rice) tin 9,000 leh bekang quintal 20 an tharchhuak tawh a; sawhthing quintal 250 atangin cheng nuai 1.25 lei tawhin, thlai hrang hrang hralhna atangin cheng sing 7 hmuh a ni tawh a. Khuai khawin (bee-keeping) atangin hi mi pathum in thawk in, litres 20 khuaizu an thar tawh bawk. Heng bakah hian Handicraft tihhmasawnna lamah hmalak niin, thawktuten cheng nuai 2.8 an lei tawh a. Self Help Group-ah te revolving fund atan sum chhung lutin, SHG member-ten hlawkna cheng nuai 2.6 chuang an tel tawh bawk a ni.

DRDA Champhai District hnuaiah IWMP – I chu R.Tuivawl Watershed Dulte, Kawlkulh, Chhawrtui leh Puilo ah 2009 – 2010 atangin tan a ni. Management Development hna hi 2012 atanga kalpui a ni. Compact Area Development-ah hian ram chuanchung ber chu ramngaw siamthat hna (afforestation) atan hman a ni a. Ram laiah hian thlai leh thei hrang hrang chin niin, ram hniam berah terrace farming kalpuiin, ruahtui khawlna siam a ni. Heng bakah hian hna hrang hrang thawh a ni bawk a. Kut themthiamna lam te, crèche siamte, tuikhur leh zun in sak leh dawr te siam bakah khawtlang tana tangkai thei tur dangte kalpui a ni.