1573/2023-2024

HRD Board Vice Chairman Dr. L.Thangmawia, Lengteng bialtu MLA chuan vawiin ni 19.8.2023(Inrinni) hian Health Clinic Centre(HCC), Kawlkulh North chu hawngin thawktu Health Worker leh IV Grade te MLA Fund-in a rawihsak nghal.

Hawnna inkhawm hun tawite neihah thusawiin Dr. Thangmawia chuan Lengteng bial khua Health Sub-Centre awmlohna zawng zawngah Health Clinic Centre sawrkar-in a hawng kim ta chu thil chhinchhiah tlak leh lawmna tham a ni tiin khawtlang hruaitute leh MLA-in an dilna ngai pawimawh a mipuite mamawh em em HCC hawnsaktu Health Department chungah lawmthu Lengteng bial mipuiten kan sawi mawlh mawlh a ni a ti.

Dr. Thangmawia chuan Covid hripui rapthlak tak kan tawrhlaia Health Department-a thawktute inpekna leh anni pui bawmtura hlawh nei lo va involunteer thalai tam takte tlawmngaihna kha Zoram mipui ten kan theihnghilh ngai dawn lo a ni tiin hetiang hun rapthlak leh a nghawng sum harsatna kan tuar mek chungin tun term kal lai meka Health Department-a hmasawnna hrang hrang, Health Clinic Centre khaw zahnih chuanga hawn thar te, Building thar 146 lai (District Hospital 3, CMO Office 5, PHC 21, Sub-Centre 63, Staff Quarter 35 leh Isolation Ward 19) sak zawh hman a nih bakah sak mek leh sak tan tur tam tak a awm mek te, sum harsa karah thawktu nghet – Doctor 45, Nurse 23 bakah a nghet lo Health & Wellness Officer 276, Nurse Contract 25 leh SEDP Health Worker 568 lai lak an ni te hi a chhawrtu Zoram mipuite tan chuan thil lawmawm tak a ni a ti.

Dr Thangmawia chuan heng hriselna lama hmasawnna hrang hrangte hi Lengteng bial pawh a zarzotu kan ni tiin Kawlkulh damdawiinah pawh X-Ray changkang tak dah thar a ni a, Isolation Ward pawh sak a ni a, hun rei lo teah Kawlkulh PHC pawhin Building thar tha tak a neih theihnan chak taka hmalak mek a ni a ti bawk.

Health Clinic Centre, Kawlkulh North atan hian Kawlkulh PHC Staff Quarter hman lailawk a ni a, bungraw mamawhte MLA Fund hmang a lei fel an ni tawh a, thawktu Health Worker  Pi Vanlalhruaii leh IV Grade Pi Lawmzeli te  MLA Fund hmanga rawih nghal an ni a,  SASCI 2023-24 sum atangin HCC building thar sakna tur cheng nuai 15 ruahman fel a ni tawh bawk a ni.

He hun hi Pu Lalduailova Sailo, VCP Kawlkulh North-in a kaihruai a, Rev Chatuan Lalhrilvela'n hunserh hmangin Dr Lawrence Lalramenga Ralte, Medical Officer, Kawlkulh PHC in thu a sawi a, he hun hmangtu zawng zawngten MLA-in tukthuan a buatsaih chu an kilho chhunzawm nghal bawk a ni.